Tura, April 13,2025: Meghalaya a·dokni dingtang dingtang Social Organisation-rang apsan nangrime bikotani ja·mano donchipenghipa Confederetion of Meghalaya Social Organisations (CoMSO)-ko gital dakpilna ba tangatpilna Tura-o tom·aniko ong·ate chanchirimaniko dakenba, gital dilgiparangko seokangaha.
CoMSO-ko tangatpilaniara, dingtang dingtang Organisation-rangni apsan ku·monge kamrangko ka·asan ong·aija, indiba songsalni bang·a dingtang dingtang daka rikanirangko ripingna aro Meghalaya a·doko songdongenggipa indigenous manderangni namroro silroroanina apsan ku·rang on·grime re·chakatna miksongani ong·a.
CoMSO-ni tom·anio dingtang dingtang Organisation-rang aro indigenous manderang apsan ku·rachakaniko dakangaha. Uandake tom·anio bak ra·gipa Organisation-rangara Hynnewtrep Youth Council (HYC), Jaintia National Council (JNC), Jaintia Students’ Movement (JSM), Confederation of Ri-Bhoi People (CoRP), Garoland State Movement Committee (GSMC), A·chik Conscious Holistically Integrated Krima (ACHIK), A·chik Progressive Approach (APA) aro United A·chik Socio Economic Justice Forum (UASEJF) aro gipin dilgiparang dongpaaha.
Tom·aniko Hynnewtrep Youth Council-ni President Roykupar Synrem dilangaha. Ua Meghalaya a·doko songdongenggipa indigenous manderangna niksamsoa gnang re·mikanganiko talatangaha. CoMSO-ni mongsonggipa dabianirango Inner Line Permit (ILP)-ko man·chape, Meghalaya Residents Safety and Security Act (MRSSA)-ko chu·gimik niam ong·ate, indigenous manderangna 44% ma·mong sorkarini kamrangko on·china dabiani ong·a.
CoMSO-ko tangatpilna Khasi, Jaintia aro Garo manderang apsan bakrime bilakataniko ra·bana miksongani ong·a ine Roykupar Synrem parakatenba, CoMSO-ni atchipilanichi indigenous rights-ko chel·chakani ong·gen. Dingataniko ra·bana CoMSO neng·nika gri kamko ka·gen aro niam gita awareness-ko ong·atgen ineba ua aganangaha.
Indake, tom·anio committee CoMSO-ni gital dilgiparangko seokangjolaha. Seoka man·gipa dilgiparangara a·dokni indigenous manderang gital daktaie, CoMSO-ni miksonganiko re·dilangna Roykupar Synrem-ko Chairman seokenba, Jaintia National Council (JNC)-ni President Sambormi Lyngdoh aro A·chik Progressive Approach (APA)-ni President Roger D.Shira-ko Vice President aro GSMC-ni Acting Chairman Balkarin Ch.Marak-ko General Secretary-na seokaha. Indake Confederation of Ri-Bhoi People (CoRP)-ni President Bandori Rymbithlang aro Jaintia Students’ Movement (JSM)-ni General Secretary Roytre Dkhar-ko Assistant General Secretary-na seokangskaha.
Unbaksana, committee regional ge·antion Organising Secretary-rangkoba seokangaha, uaranga Jacius Sangma Garo Hills, Rhembor G.Saibon Khasi Hills aro Nanshua Sutnga Jaintia Hills. Uandake Khasi, Jaintia Hills-na Jubanjoy Swer aro Garo Hills-na Tony Marak-ko Publicity Secretary seokaha. Unbaksa Tura-ni Social Activist Cherian Momin-ko CoMSO-ni Official Adviser-na seokangaha.
Gital seoka man·gipa CoMSO-ni office-bearer-rang piliakan Organisation-rangko dile nikgimin aro ma·sigimin dilgiparang ong·ani gimin, CoMSO-ko bilgnangatgen aro niksamsoanirang chu·sokgipa ong·gen, ineba Synrem aganaha.
CoMSO-ni member-rang mikkangchi sorkarini authority-rang, Civil Society aro songdongenggipa manderang baksa ku·monge ra·bianirang aro namgipa cholrangko indigenous manderang gimikan apsan kamrangko ka·anggen ine CoMSO ku·rachakangaha.
