Tura, June 1, 2025: West Garo Hills a·jani Demdema C&RD Block-ni ning·o donggipa Maulakhandi GS Circle-ni ning·o ga·akgipa bang·a songrangon niamgri jobcard-na biming segatanirangko kobor man·soe, Confederation of Meghalaya Social Organisation (CoMSO) aro Garoland State Movement Committee (GSMC) HQ, Tura baksa dingtang dingtang NGO-rang bakrime, May 30 tarik Sukrobar salo sandianirangko dakangaha.

Demdema Block-ni ning·o duplicate jobcard-rangko tarie on·engani bidingo sandianiko dakchina, Dadenggre-ni Sub Divisional Officer (SDO), Demdema C&RD Block-ni BDO, Cheman D.Shira-na ge·etaniko on·atahani gimin BDO baksa, CoMSO-ni General Secretary Balkarin Ch.Marak, Publicity Secretary Tony Tojrang B.Marak aro dingtang dingtang NGO-rangni dilgiparang baksa Bangalpar songona re·ange sandianiko dakangaha.

Sandianirangko dakanio GSMC Headquarter-ni Finance Secretary Nikcheng Ch.Marak, member Banang R.Marak, GSMC Rengmagre Unit, NGCO Chibinang Unit-ni President Abel A.Sangma, GSU Chibinang Unit-ni President Amet Marak aro GFA Chibinang Unit baksana Block-ni Additional Program Officer (APO), Data Entry Operator, local law enforcement, Village Employment Council-ni President, Secretary-rang aro joltangni Organisation-rangba dongpaaha.

Uamangni Bangalpar songona re·ange, nokantioniko sandie man·ani gitade, nokdang ge·saon, sakgittam, sakbri bilsi chu·onggijagipa nokni manderangna jobcard-rangko tarie on·aha. Nokdang ge·prako kingprak jobcard donggiparang nok 5 ba nok 7 mangsan ong·aiachim. Bang·a nokdangrangan nokni mande sakprakni bimingrangko jobcard-o register ka·e, Scheme-ni namgnirangko ra·tokenga, ine nikna gita man·aha.

Unbaksana, bang·a jobcard-rangkon, BDO-ni approval gri tarianiara niamko pe·ani ong·a. Iandake bilsi chu·onggijagipa manderangni bimingo jobcard-rangko tarianiara, Scheme-ni guidline-ko pe·ani ong·a ine NGO-rang parakataha.

Iani bidingo sandia matchotkuja dipetna MGNREGS-ni ning·o 2024-2025 bilsina tangka paisa on·anirangko ta·rake dontongatchina CoMSO-ni General Secretary bil gnanggipa authority-rangko didiataha. Sandie nianio je nokdangrangan kakket ong·achim, uamangde man·kugijagipa hajirangko man·na kraa.

Demdema Block-ni ning·o 2019-oni 2025 bilsiona krorni kror manderangni namgnina on·atgipa Scheme-rangko chongmotan, songadamni development-na chamatgipa tangka paisarangko ong·gija jakkalsretani gimin, manderangko ka·donga gri ong·ataha.

Charbatapara songni record-rangko sandie man·ani gitade, 2022- 2023 bilsio jobbcard donggipa nokdangrang 949-san dongaiachim. Indiba 2024-2025 bilsiode, 1,991-ona tang·doaha. Indake sorkariko togie, duplicate registration-rangko ka·enga ineba NGO-rang parakataha.

Iani bidingo department ta·rake audit ka·na nanga aro corruption-o jak donggipa gimikkon kakket bichalona ra·bana nanga. Manderangni namgnina on·atgipa scheme-rangko name jakkalna aro kam ka·na nanga. Uni gimin ong·gija kam ka·giparangni kosako niam raka ja·kurangko de·angchina CoMSO dabiangaha.