Tura, April 29,2025: West Garo Hills a·jani Demdema C&RD Block-ni ning·o, Mahatma Gandhi National Rural Employment Gurantee Act (MGNREGA)-ni tangka paisarangko jakkalsretaha ine matnanganiko kobor man·soahani gimin uani bidingo sandirokaniko dakchina, Confederation of Meghalaya Social Organisations (COMSO), West Garo Hills a·jani Deputy Commissioner-na chitti sedoataha.
COMSO-ni General Secretary Balkarin Ch.Marak-ni parakatani gitade, batanggipa 2020-2021 aro 2024-2025 bilsini gisepo, Demdema Block-ni ning·o donggipa Bhangarpara aro Bangalkhata songrango, niam gri Job Card-rangko on·anichi tangka paisarangko bang·en jakkalsretaha ine matnanganiko man·aha.
Badiaba nokdangrangna adita king job card-rangko tarie on·aha aro songni mande ong·gijagiparangnaba job card-rangko tarie on·aha aro biming donggijagipa manderangba MGNREGA-ni hajirarangko man·enga ine Marak parakataha.
Demdema Block-o Job Card-rangko niam gri tarie on·anio Data Entry Operator Dildar Attaullah Reza aro gipin official-rangni kosako ta·rake sandirokaniko dakchina COMSO dabiangaha.
Badiaba biaprangode chonchongipa bi·sarangko Job Card-na biming segataha aro hajirarangko man·na tol·e tarigipa Aadhar card-rang baksa link ka·gipa Account-rango tangkarangko chipataha ine matnangatenba, iandakgipa kamrangara MGNREGA-ni niamko pe·ani ong·a, maina MGNREGA Scheme-ni miksonganiara songni nokni kangal cholgri manderangna kam ka·e cha·na cholko on·enba, kangal cha·a sianiko bon·atna ma·mong sorkarini ra·gatgipa Scheme ong·a ine COMSO-ni dilgipa parakataha.
Uni gimin iandakgipa kamrangni bidingo Judicial Inquiry-ko dakchina, sakkirangko kimitna man·jana gita ua kamrango jak donggipa official-rangko kam dontongatchina, batanggimin bilsi bongana Demdema Block-ni ning·o job card aro hajira on·aniko Audit ba hisap ka·e nichina aro tangka paisa jakkalsretanio jak donggipa manderangni kosako ain gita rakgipa sastirangko on·china gitaba COMSO dabiangaha.
