Tura, June 23, 2025: Skotong Minister Conrad Sangma-ni Post Matric ba Matric Pass ka·gimim chatro chatrirangna bilsio gong 6000-ko on·na ku·rachakgimin, Chief Minister Scholarship Scheme (CMSS)-ko chu·onga gita man·jaenga ine Tura-ni MDC Bernard N Marak parakatenba, ua Scholarship-ni tangkarang bachi gimaenga ine sing·doataha.

Marak-ni parakani gitade, matric pass ka·gimin chatro chatrirangna Central on·atenghipa Scholarship baksana gong 6000-ko CM Scholarship Scheme-oniko on·dapgen, ine re·anggipa March 5 tarik Budget Session-ni somoio, a·dokni Skotong Minister Conrad Sangma an·tangan ku·rachakahachim.

Indiba, indake ong·jaenga, badiaba college-rangode chatro chatrirang, mitam gong 1500, mitam gong 2000 aro mitamrang gong 3000 kosan, CM Scholarship Scheme-oniko man·enga ine Marak parakatenba, Skotong Minister-ni ku·rachakgimin mitam Scholarship-ni tangkarang bano gimaskaenga ine sing·doataha.

“Skotong Minister an·tangan re·anggipa ia bilsini Budget Session-o ku·rachakahachim, indiba bang·bata chatro chatrirangan, Skotong Minister-ni ku·rachakgimin, gong 6000 Scholarship-ni tangkarangko man·jaengani gimin, chatro chatrirangni badi ka·anirangko man·soahani giminsa, anga iani bidingo CM office-na u·iatenga”, ine Marak parakataha.

Ia Scholarship-ni bidingo talataniko on·china CMO-ko didiatenba, “Indake CM Scholarship Scheme-ko chu·gimik man·tokjaengani a·selan chatro chatrirang jajaani ong·tokenga. Uni gimin mikkangchi chatro chatrirangni gisepo maming jajaanirang dongjana gita aro cholgrigipa chatro chatrirangna namgni ong·china, ia Scholarship-ni tangka bano maidake ong·enga, talataniko on·china anga CMO-ko mol·molatenga” ine Tura-ni MDC parakataha.