Resubelpara, Aug 21,2024:Meghalaya Basin Management Agency (MBMA) Department-ni appoint ka·ako man·e, North Garo Hills a·jao donggipa songrangona re·roroe field-o kam ka·enggipa, Village Data Volunteer (VDV)-rangna dormaha on·a tik ong·jaenga ine koborna u·iataha.

VDV-o kam ka·giparang Monggolbar salo tom·e chanchirimani ja·man, koborna parakatani gitade, CM Connect-o kam ka·enggipa VDV-rang, jean CM-ni Representative ong·a ine CM an·tangan aganahachim, indiba VDV-rangko department name nirokjaenga aro District Level-o simsakani dongsrangjaenga.

CM-ni pal songo noko ong·a obostarangko nirokna dongimin, VDV-rang CM-ko Represent ka·giparang ong·achim, indiba uamangna dormaha on·anirang chu·ongja aro tik ong·jaengani gimin, kam ka·giparang namen neng·nikaniko man·enga ine parakataha.

Ia tik ong·gijagipa kamrangna Skotong Minister, MBMA Department-ko action ra·an baksa kam ka·giparangni dormaharangko jaanti tik ong·e on·na nanga. Ia kamrangni bidingo CM an·tangan gisiko nange simsakataniko dake, kam ka·enggiparangni neng·nikanirangko ta·rake nirokatna nanga ineba VDV-rang janapataha.

VDV-rang CM-Connect, Application-o Public Grievances-rangko ba manderangni neng·nikanirangko CM baksa agangrikna aro CM-na direct u·iatna on·gimin scheme ba project ong·a, indiba MBMA Department tik ong·e nirokjaenga ineba parakataha.

Ia CM-Connect-o VDV-rangna on·enggipa Remuneration-koba Task-ni krisa on·enga. Indiba Application Advertisement-ode, kam ka·giparangna jaanti gong 3000-ko on·na gita fixed ka·ahachim uko on·jaenga. Mitam VDV-o kam ka·giparangnade jagni ba jagittam ong·oba, Task gapja ine on·gijaenga. Uni gimin kam ka·enggipa VDV-rangni neng·nikanirangko ta·rake nirokatpachina a·dokni Skotong Minister-ko mol·molataha.