Mendipathar, April 4,2025:Re·anghipa Butbar walni 11:30 bajimango North Garo Hills a·jao donggipa Mendipathar Pulis Station-ni Pulisrang aro Centre Reserve Pulis Force (CRPF) sipairang Mendipathar bajar jolo re·roroe nirok sandimiting somoio car gari bolsa rang·san ta·rakprete re·baenba, sipairangko salpakna jotton ka·ahachim.

Ua gariko pulisrang aro CRPF sipairang neng·takatna jotton ka·mitting somoio CRPF sipai saksa an·tangni jako ra·bitenggipa AK-47 silaiko maibakae goata gita dakmanaha aro gario doenggipa mande saksani ja·ako guli nangaha.

Pulisrangni koborna u·iatani gitade, Budbar walo, car gipok bolsa AS-01AM, 7750 gari, Mendipathar bajar-o donggipa rama bibra gita ta·rakprete re·baenba, Pushpa Cloth Store ba ba·ra dokkan sambao donggipa CRPF checkpoint-ona sokon, car gari ua biapo dongsoenggipa sipairangko salpakna jotton ka·ahani gimin sipai saksade bile katna man·esa jokaha.

Ua gariko pulisrang dongdiparna jotton ka·on, gari driver, ua biaponi sale katna jotton ka·e, accelerator-ko ta·rake ga·pretatahani gimin, ua biapo donggipa CRPF saksa, gariko neng·takatna an·tangni ra·bitenggipa AK silaiko cock ka·on, ua gari rang·san ua biaponi sale katna jotton ka·aha. Unomitting, CRPF saksani ra·bitenggipa AK 47 silai, maibakae goa gita dake, gario donggipa Neobirth R Marak-ni ja·ping samgnikon guli nangeaha.

Gariko salgipa aro saknaa man·gipa sakgnian North Garo Hills a·jani Resubelpara-o donggipa Thapa Darenchi songoni nong·achim. Asel ong·ani ja·mano saknaa man·gipa Neobirth R.Marak aro gari driver Sengrim K Sangma-ko sanna aro porikka ra·na gita Mendipathar PHC-ona ra·angaha aro porikka ra·e nion, uamang sakgnian chu ringa ine ma·sina man·aha aro uamangni garioniko bang·a chu bottle-rangko man·aha ineba u·iataha.

A·sel ong·anio guli nangako man·gipa Neobirth R.Marak-ko nambate sanna gita gipin hospital-ona watataha, indiba gari salgipa Sengrim K.Sangma-ko chu ringe gari salani gimin aro sipairangko salpakna jotton ka·anina pulisrang rim·aha aro iani bidingo sandianiko dakenga ine u·iataha.