Chokpot, July 8, 2025: Chokpot jolni nangrimgimin, NGO-rang, Nokma Council Chokpot Unit-ni ning·o ga·akgipa A·king dam 76-ni Nokmarang, Laskar-rang baksa Chokpot jolona skatang napbae, maming lekka-rang gri bading chiwalenggipa aro mistri kam ka·enggipa gipin jatrangko uamangni nanga lekka-rangko Nokma Sanirang sandie, da·ororo ma·sigijagipa manderangni napbaaniko nirok sandina jinma tik ka·angaha.

Unbaksana, Chokpot jolo donggipa chiring chibisikrang, bol wa·arang, gimaangengipa na·tok na·batrang aro matburungrangko maikai name ripingangna man·gen, iarangni giminba, jinma chanchiangaha.

Indake ong·engon, Chokpot Degree College-ko rika matchotgija galchipe donengani giminba, ua Degree College bulding-ko ta·rake matchotatchina contractor-ko didiataha.

GSU Chokpot Regional Unit-ni President Jish A.Sangma-ni u·iatani gitade, Chokpot jolo rikenggipa Degree College building-ko rika ta·rake matchotatjaode, contractor-ni kosako raka ja·kurangko de·angna ineba jinma tik ka·angaha.

Uandake, Chokpot Degree College-ko NEHU baksa Affiliated ka·na nangenggipa tangka gong lak 15-ko NGO-rang, Nokmarang aro songni nokni manderang an·tangtangni kusi gita gilgrime on·na gitaba jinma tik ka·angaha ine GSU President parakataha.

Ua tangkarangko jao ba bilsio gile kem·e on·china NGO-rang aro Nokmarang songni nokni manderangko didiataha.

Una agreba, Chokpot bajarni jambolrangko galchakani biapko ba a·ako sandina Chokpot jolni nangrimgimin NGO-rang, Nokmarang aro Laskar-rang tik ka·angaha ineba Sangma u·iataha.