Chokpot, July 6, 2025: Chokpot jolni nangrimgimin NGO-rang chong·motan GSU, FKJGP, GSMC, CAVC, AHAM aro AYWO apsan bakrime, Sonibar salo Chokpot Paromgre songo niamgri koela cho·enggipa biaprangko nina gita re·angaha. NGO-rangni re·ange nianio koela cho·enggipa biap sepangon, mingsinggipa biaprang donga ine nikna man·aha.

Ua biapo koela cho·genchimode, ia mingsinggipa biaprangna nangchakeani ong·gen aro nitogipa biaprang nosto ong·gen ine NGO-rang, ua biapo koela cho·aniko jegalatenba, koela cho·na man·jawa ine raken champengataha.

NGO-rangni parakatani gitade, koela cho·enggipa biapon Redengsi Wari, Wari Chora, Jamdam Wari, Tengki Rongret Wari aro gipinrang donga. Ia misinggipa warirang koela cho·genchimode nosto ong·gnok, uni gimin ua biapo koela cho·na man·jawa ine NGO-rang raken champengataha. Uni gisepon saoba manigija ua biaponiko koela cho·ode, mikkangchi rakbata ja·kurangko de·anggen ineba NGO-rang parakataha.