Baghmara, Aug 28,2024: South Garo Hills a·jani Chokpot jolo donggipa bang·a Govt. LP aro UP skul nokrang namjani a·sel skie ra·enggipa bi·sarang namen neng·nikaniko man·enga ine Garo Students’ Union (GSU) Chokpot Regional Unit-ni General Secretary Spensar R.Sangma u·iataha.
Spensar Sangma-ni Garo Digital News-na u·iatani gitade, badiaba skul nokrang nokking sela, nokking dongja, kelki do·ga dongja, pakmarang be·a aro badiaba skul nokrango asongchakanirang dongja. Iandakgipa Govt. LP aro UP skul nokrangko MDA sorkari maina nichanggalenga ?, uarangko taridapna ma·mong sorkarini chamatgipa tangka paisarang bachi gimaskaenga ine GSU dilgipa sing·doataha.
Skulo skigiparang class-rangko ra·engon, badiaba skul nokrangde nokking dongjae, mikka wachi chakesa class-rangko ra·enga aro bi·sarangba apsandaken mikka wadapako man·enga, iandake bi·sarangni mikkangchi dal·gni chugnina dariengon ba an·tangtangna seng·aniko skie ra·engon, bi·sarang bang·a neng·nikanirangko man·enga, Spensar R.Sangma suk ong·gijaniko parakataha.
Songo noko indakgipa neng·nikanirangko chake bi·sarangni skie ra·chakenggipa skul nokrangko a·dokni Skotong Minister Conrad K Sangma ta·rake nirokatna nangchongmota ine didiatenba, skie ra·enggipa bi·sarangna nama skul nokrangko taridape on·na man·genchimode, changsao A·chik A·songni bi·sarangba chubata gadangona tang·doangna gita cholko man·pagenchim ine GSU dilgipa parakataha.
