Baghmara, February 27,2025:GSU Chokpot Regional Unit, Chokpot Area Vigilance Committee (CAVC), Nokmarang aro songni manderang, Chokpot jolrango chu·onga gita chirangko man·jaengani a·sel songni manderang namen neng·nikaniko man·tokengani gimin, Butbar salo Chokpot PHE Sub Division office-ona re·ange, Chokpot jolrango ringani china neng·nikaniko parakeaha.

CAVC-ni Chairman Jesswell Ch Marak-ni parakatani gitade, Chokpot jolrango chirangko man·jaengani gimin, Chokpot PHE Office-ona re·ange, Chokpot Greater Water Supply Scheme-ni bidingo Sub-Divisional Officer (SDO) baksa agangrikeaha. PHE-ni SDO baksa agangrikon, ua water supply scheme-ni kamrangko ta·raken matchotatna jotton ka·gen ine ua ku·rachakataha.

Chokpot Greater Water Supply Scheme-ko 2022 bilsion a·bachengatahachim, indiba da·alonan ua Scheme-ni kamrangko matchotkujaenga. Uni gimin Chokpot jolo songdongenggipa manderangni namgnina ua Water Supply Scheme-ko ta·rake matchotatchina NGO-rang a·dok sorkariko aro PHE department officer-rangko mol·molataha.

Uni gisepon, NGO-rangni mol·molaniko knachakja ong·ode aro Chokpot Greater Water Supply Scheme-ko matchotate on·jaode, mikkangchi rakbata ja·kurangko de·anggen ine GSU Chokpot Unit aro CAVC-ni dilgiparang parakataha.

Chokpot PHE Office-o kam ka·engoba, Chokpot jolrango songdongenggipa manderang, batanggimin bilsi 20 mangna baten, PHE department-ni on·enggipa chirangko man·tokkuja aro Chokpot jolrango songdongenggipa manderang gimikan Dareng Chibimanikosa pilak nanga kamrangna jakkalenga, ineba GSU Chokpot Unit, CAVC aro songni dilgiparang parakataha.