Tura, June 5,2025:Babadam Chidekgre songo rikenggipa Tribal Research Institute (TRI)-ko bilsigni, bilsigittam ong·piloba matchotchipkujaengani gimin, ia Institute-ko ta·rake matchotatchina, Social Activist Cyril A.Sangma, Butbar salo West Garo Hills a·jani Deputy Commissioner-ko mol·molataha.

Ia Institute-ko rika matchotatningija ru·ute donchipanichi a·dokni namroro silroroani aro songdongenggipa manderangni namgnina nangchakeani ong·enga ine Sangma parakataha.

“Iako ru·utatani bidingo namedake sandianiko dakeba, nanga gita ja·kurangko de·e, kamko a·bachengatpilchina aro ia project-ko ta·rake matchotatchina, anga mol·molatenga” ine Social Activist didiataha.