Tura, Nov 14, 2024: North Eastern Hill University (NEHU) Shillong aro Tura campus-ni chatro chatrirang baksa KSU-NEHU Unit, GSU CEC Tura aro GSMC HQ Tura bakrime adita salrangna jingjengatani ja·man, Budbar walo, NEHU Campus damgnion Pro Vice Chancellor (PVC)-rangko, NEHU-ni Vice Chancellor Prof Prabha Shankar Shukla songe on·ataha.

NEHU Tura campus-na Garo Department-ni Head, Dr. Fameline K Marak-ko aro NEHU Shillong Campus-na Education Department-ni Head Prof Sherwin May Sungoh-ko Pro Vice Chancellor dake songataha. NEHU campus damgnina PVC-ko Budbar attamo, NEHU-ni VC Prof Prabha Shankar Shukla parakatahaoba, da·o PVC sakgniko University-ni Executive Council (EC) ra·chakna nangkuenga.

NEHU-ni Vice Chancellor Prof Shukla-ko kam watchina, Registrar aro Deputy Registrar-ko ra·galchina aro NEHU-ni Campus damgnion PVC-rangko songe on·china, Shillong aro Tura Campus-o chatro chatrirang, dingtang dingtang dolrang bakrime dontonggija jingjengatanirangko dakengani gimin, chatro chatrirangni dabia gita NEHU Campus damgnion PVC-ko songe on·ataha.