Williamnagar, Mar 13, 2025: Butchers Association, Simsanggre March 12 tarik Butbar salo General Meeting ba tom·bimonganiko, East Garo Hills a·jao donggipa Rongongre Babare Park-o ong·atangaha.
Ia tom·bimonganiko ba General Meeting-ko a·bachengna skang Butchers Association-ni President Krish N. Marak biapko ra·e, Joint Secretary Luben Marak-ni ku·rangchi Isolo bi·ate tom·aniko a·bachengataha.
Ia tom·bimonganio Butchers Association-ni President tom·aniona sokbagipa manderang sakantikon kusi ong·bee rimchaksoani kattarangko aganangaha.
Indake, tom·anio Butchers Association-ni tangka paisa Report-ko bi·on Secretary Cum-Accountant Roucking Manda Sangma, bilsigimiko gong 155600 tangkarangko man·aha aro koros ong·a gimik gong 132700 ong·aha, da·o gong 22900 dongkuenga ine parakangaha.
Dokkan basarango ringe cha·e joa ba tas kal·e chrik a·bokani gimin chanchion, je mandean niamko pe·a ua mande gong 500-ko fine ba dai gamna nangen ine jinma tik ka·angaha.
Association, dongimin dam ba rate-na bate wak, matchu aro na·tokrangko palani gimin chanchion, Municipal Board je Rate-kon on·aha, uko ja·rike palna nanggen ine jinma tik ka·angaha.
Municipal Board-ni jolrango skatang wak, matchu palani gimin aro motor bike-rango na·tokrangko ra·rurae palani gimin chanchion, maming documents ba lekkarang gri Association-o bakrimgija ba join ka·gija skatang palna man·jawa, ine jinma tik ka·e ra·chakangaha.
Tom·anio chanchina nanganirang dongjahani gimin, mittelpilskaani kattarangko Association-ni Vice-President Jesber Marak-chi agane uni ku·rangchin Isolo bi·e tom·aniko gipin changona dontongangaha.
