Tura, Feb 6,2025:Butbar salo State Forest-ni authority-rang, GSU-CEC,HQ-ni dilgipa Sengman Sangma aro A·chik National Youth Organisation (ANYO)-ni General Secretary Bipin M.Sangma bakrime, bol cha·ue salanggipa gari bolsako rim·aha.
Tura Dobasipara Pulis Station-ni ning·o donggipa Diagre songo niamgri chalaienggipa bol ratani karkanao jakkalgipa bosturangko ra·sekan baksa bol cha·ue salangenggipa bolero pickup ML-08G-7055 bolsako rim·na gita man·aha aro uko Forest department-na pakwataha.
Koborna u·iatani gitade, niamgri bol ratani karkanako chalaienggipa aro bol cha·ue salanggipani bidingo koborko man·soe, Forest Officer-rang aro NGO-ni dilgiparang, ua biapona re·ange niahaon, bol cha·ue salanggipa mande baksa gari bolsako rim·aha aro niamgri chalaienggipa bol ratani karkanao jakkalgipa bosturangko ra·sekaha.
Rim·a man·gipa mandeo bol salani maming lekkarang, chong·motan TP dongjachim. Ua gario gatgimin bol dot 140 aro bang·a doktarangko man·aha. Uarang gimikkon Forest Officer-rang aro NGO-rang ra·sekaha ine u·iataha.
