Tura, Mar 7, 2025: BJP-ni bimingo Pradhan Mantri Awas Yojana (PMAY) ba Low Cost Nok aro gipin Scheme-rangko on·gen ine tol·e tangka gile cha·enggipa, Ajay Saha minggipa mandena simsakchina District BJP Tura, manderangko mikkrakataha.
Ajay Saha an·tangko BJP-ni mande ine aganenba, manderangna dingtang dingtang Scheme-rangko dake on·na ku·chakenba, manderangoniko gong 1000-7000-ona tangka cha·boke ra·enga, ine parakataha.
Ajay Saha-na manderangni tangka chipatgipa receipt-rangko Tura pulisna on·aha aro sandianiko dakchina March 5 tariko FIR ka·aha. Ajay Saha-ni manderangoniko tangka bi·ate cha·enggipa mobile number-ara 9233144235 ong·achim.
Indake manderangoniko tangka togie cha·bokanirango BJP maming bak dongja. Indakgipa manderang BJP-ko namgija biming man·atna dakgiparangsa ong·a. Dos grigipa manderangko ong·gija kamrangchi cha·boke cha·gipa manderangko BJP watjawa. Uni gimin, uandakgipa Scheme-rangna saoba dorgasto galna sikode, Tura BJP office-ona re·bae on·ena man·gen ine District BJP Tura-ni General Secretary Wilver Greham M.Danggo u·iataha.
