Bihar, Sept 14, 2024: Bihar a·dokni Samastipur minggipa biapo mingsa aiao inmanpile jagokmanpilgipa a·sel ong·aha. Nurse saksa an·tangko til·ekdrana jotton ka·gipa Doctor saksani nampagija be·en-ni bakko rasotaha. Ia a·selko pulisrang knaani ja·man dos dakgipa doctor aro uni ripeng sakgniko rim·aha.

Indake a·sel ong·ani ja·mano Doctor-ko hospital-o sanna gita ra·angaha ineba parakaha.

Ia aiao inmanpilgipa a·sel, Musrigharari Pulis Station-ni ning·o donggipa RBS Health Care, Gangapur-o ong·aha.

Koborni gitade, hospital-ni operator Dr. Sanjay Kumar Sanju uni ripeng sakgni baksa chu ringaha. Uni ja·mano nurse-ko kal·akna a·bachengaha. Jensalo nurse doctor-ni kragija kamko jechakaha aro uko til·ekdrana jotton ka·aha.

Nurse ka·dongen an·tangko ong·gija dakna jotton ka·aoniko jokataha aro doctor-ni nampagija be·en-ni bakko surgical blade-chi rasotaha.

Ia a·sel ong·aniko kobor man·soani bakan pulisrang hospital-ona re·angaha aro nurse-ko jokatani ja·man dos dakgipa sakgittamko rim·aha.

Doctor-ni gipin sakgni ripengrangara Sunil Kumar Gupta aro Awadhesh Kumar ong·achim. Pulisrang sandianiko dakenba, hospital-oniko chu bottle te·sa, nurse-ni jakkalgipa blade, an·chi gnanggipa ba·rarang aro mobile phone ge·gittamko man·aha. Pulisrang ua manderangko Bihar a·dokni dongimin niamrango pangchake mamlako jako ra·anggen ine parakaha.