Tura, Dec 17, 2024:Garo Hills-ni ramarang gita Bhutan a·songoni Bangladesh a·songona ro·ong salruraenggipa truck garirang niamna bate ro·ongrangko salengani gimin, West Garo Hills a·jani pulisrang, bol 15 ro·ong salgipa truck garirangko Tikrikilla pulis station-ni ning·o donggipa Rongsai-o champengsoaha ine koborko man·aha.

Bhutan a·songoni ro·ong salgipa truck garirang, India a·songni dongimin niamrangko pe·e, rong·terangko salengani a·sel Garo Hills-ni rama jal·langrang nosto ong·atako man·enga aro manderangna kenchakani ong·enga ine dingtang dingtang NGO-rang aro jolni manderang badi ka·ani ja·man, ro·ong salgipa truck garirangko West Garo Hills a·jani pulisrang, Assam aro Meghalaya a·dokni sima ari jolo champengsoaha.

Koborni gitade, 3 axle truck garirango bosturangko salna gita metric ton (MT) 18-san on·aiachim, indiba Bhutan a·songoni ro·ong salbaenggipa truck garirang, MT 60 ba 70 mang ro·ongrangko salengachim.

Bosturangko truck garirango salna gita MT 18-san man·aiahachim, indiba Bhutan a·songoni Bangladesh a·songona ro·ong salruraenggipa truck garirang, MT 60 ba 70 mang ro·ongrangko salskaenga. Ua truck garirang, dingtang dingtang toll gate-rango kajinarangko gamna nangengani gimin noksan ong·enga ine ro·ongrangko dongimin niamna bate salskana nangenga ine pa·sikatengon, indake niamko manigija ro·ong salani a·sel West Garo Hills a·jani Hallidayganj sambao donggipa dollong ge·sa be·gruaha, ine Phulbari-ni mande saksa matnangataha.

Ua dollong be·ani a·sel Agia-oni Medhipara Phulbari gita Tura-ona re·gipa (AMPT) rama gita bostu salruraaniko dontongatna nangaha ineba parakataha. 

Indake adita salrangna skang, AMPT rama aro Paikan-oni Tura gita Dalu-ona re·gipa (NH)-51 rama gita bosturangko salrurana on·taiani a·sel truck garirang, niamko pe·e, dingtang dingtang bosturang aro ro·ongrangko salrurana a·bachengtaiahani gimin ua truck garirangni kosako manderang aro dingtang dingtang NGO-ang badi ka·ani ja·man, Bhutan a·songoni ro·ong salruragipa truck garirangko pulisrang champengsoe watatpilaha.

Robibar saloba truck garirang, AMPT rama gita manigija ro·ongrangko salna jotton ka·ahachim, indiba pulisrang kobor man·e, ua garirangko Rongsai jolo champengsoaha aro ua garirangko watatpilaha.

Indake niamgri bostu salruragipa truck garirangko mikkrake nirikkichina pilak Pulis station, out post-rangni OC aro IC-rangna ge·etaniko on·ataha ine West Garo Hills a·jani SP Abraham T Sangma parakataha.