Tura, Aug 22,2024: Babadam jolo donggipa ge 5 mobile tower-rangko network watgija donchipani a·sel jolni manderang suk ong·gijaniko parakataha.

Iani bidingo Babadam Area Youth Development Committee (BAYDC)-ni gitcham President Sathon A.Sangma-ni u·iatani gitade, re·anggipa bilsio network provider office-chi re·ange complaint ka·an baksa technician-na call ka·ate u·iatani gimin, network namkalachim. Indiba da·ode, mobile network namsrangjani a·sel neng·nikaniko man·tokenga.

“Batanggipa somoirango mobile tower-na diesel salgiparangko pale cha·ani gimin, chinga jolni adita sak volunteer-rangko mobile tower-na diesel salbaani somoio tower-ona watate, diesel pale cha·aniko nirokna donahachim, indiba da·ode tower-na diesel salbachipjaenga. Anga an·tangan nirok simsakdilaniko dakahachim. Indiba ge 5 mobile tower-rangko simsakgija donchipenga. Anga BAYDC-ni gitcham dilgipa ong·oba, iadangipa neng·nikani somoio songni manderangna dangdike on·kuenga” ine Sathon Sangma u·iataha.

Babadam jolo network watjani a·sel, internet gita dingtang dingtang kamrangko ka·giparang, PHC-o kam ka·giparang aro online gita porikka segipa chatro chatrirang internet namjani a·sel bang·a neng·nikaniko man·tokenga ineba u·iataha.

Uni gimin, Babadam jolo donggipa mobile tower-rangko ta·rake nirokatenba network-rangko watpachina Sathon Sangma tower chalaigiparangko mol·molataha.