Tura, Oct 3,2024: October 2 tarik Budbar salo, Rongram C&RD Block-ni ning·o donggipa Selbalgre songo, Plastic Waste Management Unit-ko Meghalaya Legislative Assembly-ni Speaker Thomas A Sangma kulie on·angaha. Ia Unit-ko kulie on·ani salo Swachh Bharat Diwas-koba maniangjolaha.
Iako ong·atanio, West Garo Hills-ni SDO (Sardar) Manish Kumar, Rongram C&RD Block-ni BDO Cherime Sangma, Mawmluh Cherra Cements Limited (MCCL)-ni Vice Chairman Dabo Mrong Marak, PHE department-ni SE Ambrose D Sangma, dingtang dingtang department-ni officer-rang aro jolo songdongenggipa manderang bak ra·angtokaha.
Garo Hills-o ia Plastic Waste Management Unit-an skanggipa ong·aha. Indake ia tom·anio, Assembly-ni Speaker Thomas A Sangma, jinmana aganprakengon, Tribal songrangode pangnan rongtal an·talaniko rakkirongachim, indiba da·ororode pilak biaprangon plastic-ko jakkaltokengani gimin songadam nokadamrangoba jabolrarako nikna man·engaha ine songo noko jabolrang galanirangko champengchina didiangaha.
Manderang skatang jabolrangko galengani a·sel jabol galtimgiparang jabolrangko ma·eke galanio neng·nikanirangko man·tokenga. Uni gimin jronggipa aro soninggijagipa bosturangko noktangtango dingtang basee galchina Thomas Sangma, songni nokni manderangko didiangaha.
Ia Plastic Waste Management Unit-ko kulianichi plastic jabolrangko nama bewalo chimonge jakkalpiltaina dakchakani ong·gnok ineba Assembly Speaker aganangaha.
Manderangni namgnina, rongtal an·talaniko rakkina gita sorkari dingtang dingtang scheme-rangko ra·gate on·enga. Manderang nama bewalrangko pangnan ja·rikchina aro ia a·gilsakko mikkang chasongrangona name rakkiangchina gitaba Sangma didiangaha.
Ia tom·anio, PHE-ni SE aro West Garo Hills DSBMG-ni Member Secretary Ambrose D Sangma-ba jinmana aganprakengon, Swachhta Hi Seva Campaign-ko a·songni pilak biaprangon rongtal an·talatanirangko dake Swachh Bharat Mission-ni bilsi 10 gapaniko manina gita 2024 bilsini September 17 tariko a·bachengataha aro ia campaign-ko October 2 tariko Swachh Bharat Diwas-ko manianichi matchotatenga ine aganangaha.
