Baghmara, Oct 26, 2024: Chang 34-gipa Captain Williamnson Ampang Sangma-ni siani salko maniani salo Baghmara-o donggipa Capt Williamson Memorial Govt College-ni bilsi 33 gapaniko maniani bak gita ua college-na gital Academic Building-ko rikna gita Sukrobar salo, Meghalaya Legislative Assembly-ni Speaker Thomas A Sangma pangchakani ro·ongko songe on·angaha.
Ia gital Academic Building-na Rashtriya Uchchatar Shiksha Abhiyan (RUSA)-ni ning·o gong kror 5 tangkarangko chamatahachim.

Ua college-na gital building-ko rikna pangchakani ro·ongko songe on·anio, a·dokni Education Minister Rakkam A Sangma, Baghmara-ni MLA Kartush R Marak, Chokpot-ni MLA Sengchim N Sangma, Education Department-ni Adviser HM Shangpliang, MDC Natwal S Marak, Education Secretary Ambrose Marak, Higher & Technical Education-ni Director HDB Sangma, Baghmara-ni gitcham MLA Satto R.Marak aro gipinrang dongpae bak ra·angaha.

Indake tom·anio, a·dokni Education Minister Rakkam A Sangma, jinmana aganprakengon, ia college-ni Academic Building-na Rashtriya Uchchatar Shiksha Abhiyan (RUSA)-ni ning·o gong crore 5 tangkarangko chamataha ine parakatenba, chatro chatrirangko mande ong·atna skigiparangni dakgni kamrangko agan-talate on·angaha.

Rakkam Sangma ua college-ni gital website-ko kulina aro college building-ko dal·batatna man·ani gimin, ua an·tangni kusi ong·aniko parakatenba, South Garo Hills a·jani chatro chatrirang dingtang dingtang porikka result-rango tang·dona man·kujaengani gimin suk ong·gijaniko parakangskaha. South Garo Hills a·jani pilak skulrango skie on·anirangko namdapatchina skigiparangko didiangaha.

South Garo Hills-o porikka result-rang namjaengani gimin saksa sakgipinko matnanggrike dongaija, South Garo Hills a·jao result-ko nambatatna rake kamrangko ka·china gitaba Rakkam Sangma didiangaha.

Indake tom·anio, Thomas A.Sangma mongsonggipa sokgipa ong·e, jinmana aganprakangengon, ia salara college-ni bilsi 33 gapaniko maniani aro college-na gital building-ko rikna oprake on·na man·ani gimin ia college-nasan ong·aigija, South Garo Hills a·ja gimiknan gisik ra·beani sal ong·a ine aganangaha.

College-o skie on·giparang aro gipin kamko ka·giparang gisiko nange dangdikengani gimin mittelangenba, ia college-o poraienggipa chatro chatrirang chu·sokgiparang ong·na gita gisiko nange poraichina Assembly Speaker didiangaha.