Shillong, June 14, 2025: Indore songjinmani tourist Raja Raghuvanshi-ko Sohra-o ka·saninggija so·otaniara aiao inmanpilani ong·aha. Sonam Raghuvanshi aro unbaksa gipin sakbri manderangko Meghalaya Pulisni sing·sandianio ma·siani gitade, mande so·otanina pangnan uamangni gisiko chanchiani donga ine u·ina man·aha.
Sonam, Raja-ko bia ka·na ja 4 skangan, Sonam-ko gimaatna chanchianirangko a·bachengaha. An·tangni gimaani aro sianiko dakjena jotton ka·anio chu·sokjae, Raja-ko so·otaona sokaha ine Pulisang aganaha.
East Khasi Hills a·jani, Superintendent of Pulis, Vivek Syiem-ni gitade, Raj Sonam-ni gimaaniko February jaonin chanchisamsoaha. Uarangoni mingsara Sonam-ko chibimao man·paka ine mesokna aro minggipinara sakgipin mandeko so·ote Sonam-ni scooty-o done, manggisiko so·e, Sonamni manggisi ine aganna dakachim, indiba uarang pilakan chu·sokjaha.
Iarangko chanchiengmiting somoion Sonam, Raja-ko bia ka·ani somoi sokaha, indiba uamang Raja-ko so·otani ja·man dongnue chakna manchisomanahachim.
Pulisrangni sing·sandianio, Sonam, Raja-ko bia ka·na sal 11 skangan uko so·otna Raj aro Sonam chanchisoaha, ineba aganaha. Madhya Pradesh namen chel·beani gimin, songtang noktangona koborrang ja·manchakesa sokanggen ine chanchienba, uamang Meghalaya-chi re·bana tik ka·aha.
“Raja aro Sonam bia ka·ani ja·mano Kamakhya Mondir-o bi·na re·baaha aro gipin sakgittam manderangba re·bapaaha,” ine SP aganaha. Vishal Singh Chauhan, Akash Rajput, aro Anand Kurmi, May 19 tariko Guwahati-ona sokeaha, aro uanon Raja-ko so·otna biaprangko nisoaha.
Assam-o Raja-ko so·otna miksongani chu·sokjae, Sonam Sohra-ona re·badilskaaha. Nongriat-on uamang Raja-ko so·otna jotton ka·ahachim, indiba manggisiko galna biap man·jae donpilaha. Indake uamangni miksonga chu·sokjaha.
Bon·kame, May 23 tariko, Wei Sawdong-ni parking lot-o salni 2 ba 2:18 bajini gisepo, sakgittam me·asarang Raja-ko attechi den·aha aro Sonam-ba sambaon chadenge dongpaha. Uni ja·mano uamang sakbri Raja-ni manggisiko a·silangchi galonataha. Indake, June 2 tariko Raja-ni sogimin manggisiko a·silangoniko man·pilaha.
Raj-an iako dakna mongsongbate chanchidilaha aro sakgittam so·otgiparangara tangka on·e rakkigiparang ong·ja, indiba Raj-ko dakchakgipa uni ripengrangan ong·a ine SP Syiem parakataha.
Ramarangni korosna Raj uamangna tangka gong 50,000-ko on·aha aro iana agre tangka-paisa ba gam-jinrangko on·na ku·chakani dongama dongja pulisrang sandikuenga.
Raj aro Sonam-ni chanchisamsoanirang maming obosta gri name chu·sokna siengahachim aro Sonam sal 17 dongnue katna man·aha. Indiba, Meghalaya Pulis uamangni miksonganirangko rim·a man·aha aro dos dakgiparangko rim·aha. Sonam June 9 tariko Uttar Pradesh (UP)-ni Ghazipur-o mikkang pa·e an·tangko UP pulisna bame on·eaha.
Dosi dakgipa sak 5-ko pulisrang sal 8-na rim·e donenga aro ia obostani bidingo sandianirangko dakenga. Raja-ko so·otaniara Sonam-ni nokni manderang aro songsarni gisepo bia ka·draatani a·sel ong·a ine Pulisrang ma·siaha.
Bilsi 24 ong·gipa Sonam, Indore-o nokdangni plywood-ko bading-chiwalanio accountant-ni kamko ka·gipa Raj Kushwaha baksa sruksruk mikchaengachim, indiba nokni manderang uko namnikjaha. Raja baksa drae bia ka·atgenchimode, iani biteko man·gen, aro Raja-na maiba namgija obostako ra·bagen ine Sonam noktangni manderangko ka·mikkenataha ine pulisang aganaha.
Sonam-ni ma·drangrangni aganani gitade, ua skia poraia donggipa me·chik ong·achim aro ua graduationko matchote, MBA dakna skachim, indiba nokni manderang uko a·palchi kam ka·na on·jaha aro uni adatang Govind-ko bading chiwalanio dakchakna aganaha. Sonam an·tangba dingtang dingtang kamrangko ka·e nokdangni bading chiwalaniko chalaiengachim.
