Tura, April 15,2025: West Garo Hills a·jani Phulbari Pulis Station-ni ning·o donggipa Chibinang Maulakandi songo bolrangko cha·ue, Assam a·dokchi ra·angna chimonge donenggipa bolrangko da·al April 15 tariko Social Activist Janynie Sangma baksa State Forest aro Phulbari Pulis Station-ni Pulisrang bakrime rim·aha.

Garo Hills-ni bolrangko niamgri cha·ue, Maulakandi songo donggipa, Mozibur Rahman minggipa mande saksani biapo chimonge donenga, ine ning·il ning·il koborko ma·soe, Social Activist, Holaidonga State Forest Range Officer-rang aro Phulbari Pulis Station-ni Pulisrangna kobor on·atani bakan Holaidanga State Forest-ni manderang aro Phulbari-ni pulisrang biapona re·ange nion, Assam a·dokchi ra·angna tarie donenggipa bang·a bolrangko nikaha.

Holaidanga State Forest Range Officer-ni manderang aro Pulisrang, ua bolrangko sawa ra·baha ine sing·on, a·a nokgipa walni somoio sawa ra·bae dona ma·sija, ine aganchakaha. A·a nokgipa bol ra·bae uni biapo dongipa mandeko rim·e on·na man·jani gimin aro darangba ua bolrangko a·kanggipa dongjahani gimin, Holaidanga Forest Office-ni manderang tractor gari bolgni aro mini truck bolsa ra·bae, ua bolrangko Holaidonga Forest Office-ona ra·angaha.

Walantian, Garo Hills-ni bolrangko cha·ue, Assam a·dokona badingsrukatengani gimin, Garo Hills-ni bolrang bon·angroroenga, ine Social Activist suk ong·gijaniko parakataha.

Indake, niamgri Garo Hills-ni bolrangko cha·ue badingsrukanirangko champengna gita a·dok sorkari Chibinang jolo ge·sa aro Phulbari-o ge·sa, State Forest Office-ko donna nangchongmotenga aro Forest department-o chu·onga gita nirokgipa manderangko donna nangchongmota. Maina Chibinang gitan Garo Hills-ni dingtang dingtang biaprangoniko bolrangko cha·ue, Assam a·dokona badingsrukatani batsotram cholguga ong·a ine Jaynie Sangma parakataha.

Unbaksana, Maulakandi songo bang·a bol ratani kolrangko jakkalenga ineba koborko man·aha, indake niamgri saw mill-rangko jakkalani a·sel, A·chik a·songni buring bolgrimrangko nosto ka·engaha ine janapatenba, niamgri A·chik a·songo bol cha·ugiparangko champengna man·jani a·sel, saoba namgniko man·enga, indiba A·chik a·songni chiring bibisikrang tipangskaengjok, ineba Jaynie Sangma parakataha.

Uni gimin niamgri bol badingsrukanirangko raken champengatna aro bon·atna nangchongmotenga, uni gimin bol cha·ugiparangna raka sinjetaniko on·na nanga aro ua manderangni kosako rakgipa ja·kurangko de·na nangenga. Ong·jaode, A·chik a·song mikkangchi mai ong·gen, ineba Social Activist sing·doangaha.

Indake, Maulakandi-ona bol cha·ue ra·bagipa mandeko darangba rim·e on·na man·jani gimin, Social Activist a·a nokgipa Mozidur Rahman-ni kosako Phulbari Pulis Station-o FIR ka·doangaha.