Tura, Feb 23, 2025:A·chik State Peoples’ Front (ASPF), HQ Tura, ASPF Dainadubi Regional Unit aro GSMC Dainadubi Regional Unit bakrime, February 22 tarik Sonibar salo Winter Capital-ko Tura-o songe on·china, a·dok sorkariko didie jatni ku·rangko sokatna, Winter Capital-ni bidingo jinma tom·aniko ba Awareness Program-ko North Garo Hills a·jani Dainadubi Chisim A·pal Community Hall-o ong·atangaha.
Ua tom·anio Dainadubi jolni wilwilao songdonggipa bang·a manderang re·bae bakko ra·angtokaha.
ASPF HQ, Tura-ni General Secretary Bernita R.Marak, jinmana aganangengon, bang·a manderangan Winter Capital-ni gimin jajatokenga. Manderang Winter Capital-ko Winter Festival ine ma·sisretenga, indiba Winter Capital aro Winter Festival namen dingtanggrika. Winter Capital-ni miksongara, Meghalaya a·doko songdongenggipa manderang apsan chu·gipa gadango tang·doani aro namro silroroanirangko man·na gita, skangni pagitchamrang aro a·dokni dilgiparang, Shillong-ko Meghalaya-ni skotong dake, jadok ding·karini somoio chong·motan, Summer Capital-ko Shillong-o aro sin·karini somoio jadok Winter Capital-ko Garo Hills-o songe, Assembly-ni tom·aniko ong·atna, jatgittam dilgiparangni gisepo tik ka·gimin ong·achim.
Indiba Meghalaya a·dokko man·chengani da·o bilsi 50 batangpiloba, pagitchamrangni ku·rachakgimin, Winter Capital-ko Tura-o songe on·kujaengani gimin, Garo Hills-o Winter Capital-ko songe on·china sorkario dabie, A·chik jatgimik apsan ku·rang on·aniko mesokna, Garo Hills-ni dingtang dingtang biaprango Winter Capital-na dabie tom·anirangko ong·ate, Winter Capital-ni bidingo awareness program-rangko ong·atna miksongenga ine Marak parakangaha.
Indake, February 22 tariko North Garo Hills a·jani Dainadubi Chisim A·pal-o ong·atangaha. Uandake, re·baenggipa March 1 tariko South West Garo Hills, Garobadha-o, March 7 tariko South Garo Hills, Baghmara-o, March 15 tariko East Garo Hills, Simsanggre-o aro March 22 tariko West Garo Hills, Tura-o Winter Capital-na dabie tom·anirangko ong·atanggen ineba Marak parakataha.
