Tura, June 6,2025: A·chik State Peoples’ Front (ASPF), chang 13-gipa tom·bimonganiko re·anggipa Budbar salo, Tura-ko Winter Capital songchina dabiani bidingo manderangna talate on·na gita, East Garo Hills a·jani Mangsang Bamil kal·chakramo ong·atangaha.
Ia tom·aniko Garo Students’ Union (GSU) Mangsang Regional Unit aro FKGJP Mangsang Regional Unit baksa bakrime ong·ataha aro ia tom·aniko ASPF Williamnagar Unit-ni Adviser Ronal Bryan A Sangma dilangaha.
Tom·aniona re·bagipa manderangko GSU Mangsang Regional Unit-ni President Barnawel R. Sangma rimchaksoani kattarangko aganangaha. Ia tom·anio ASPF-ni General Secretary Bernita R Marak, GSMC-ni Acting Chairman Balkarin Ch Marak, Mangsang jolni laskar Lipingston Sangma aro FKJGP Mangsang Circle-ni President George D Sangma-ba dongpae jinmana aganprakangaha.
Tom·anio ASPF-ni General Secretary Bernita Marak, jinmana aganprakengon, Tura-ko Winter Capital songaniara Meghalaya a·dokko man·dilchenggipa pagitchamrangni ku·rachakgimin kattarang ong·a aro iani bidingo A·chik a·songni manderangna u·iatna gita ia dabianio bakrimaniko on·china didiangaha. Iani bidingo ASPF Garo Hills-ni dingtang dingtang biaprangon Awareness Program-rangko ong·atenga ine aganangaha.
Garo Hills-ni namroro silroroanina Tura-ko Winter Capital songna nangchongmota. Ia dabianio Garo Hills-ni pilak manderangkon bakrimchina Marak didiangaha.
Ia dabianio Garo Hills-ni pilak dilgiparangan ku·cholsan bakrimtokchina Marak didiangaha.
Bon·chote ASPF Williamnagar Unit-ni Chief Organizing Secretary Birash Sangma-chi mittelpilani kattarangko agane tom·aniko matchotataha.
