Tura, June 6, 2025: A·chik State Peoples’ Front (ASPF) Rongram Regional Unit, AHAM Rongram Regional Unit, Green Tech Foundation (GTF) Garo Hills Division, Marthin Luther Higher Secondary Skul aro Aguragre UP Skulni skigiparang aro chatro chatrirang baksa bakrime, “Ending Global Plastic Pollution” ine Theme ba miksonganiko done, World Environment Day-ko maniangaha.
Ia World Environment Day-ko maniani salo plastic-ko bon·atani aro jakkalani bidingo talatangenba, environment-ko maikai ripinggen, songni manderangna aro skul bi·sarangna talate on·angenba, bol-wa·a gri bangbang ong·gipa biaprango bang·a bolrangko ge·aha ine ASPF Rongram Regional Unit-ni President Mano R.Marak parakataha.
A·gilsak gimikon June 5 tariko, World Environment Day-ko manitokengon, Garo Hills-ni NGO-rangba World Environment Day-ko maniangtokaha aro dingtang dingtang biaprango bolrangko ge·angtokaha. A·gilsako salni ding·anirang batrikrikani a·selara, bol-wa·arang komiroroanganichi ong·enga. Uarangko tange ripingna, tipangangenggipa chiring chibisikrangko tange rakkina, an·ching sakantini daitoan ong·a.
Iarang gimikan, an·chingni a·gilsako bol-wa·arang, nitogipa buring bolgrimrang gimaroroangani a·sel ong·enga, ine parakatenba, iarangko tangchaatpilna man·gen, sakantian apsan ku·monge kamrangko ka·na nangchongmotengaha, ine Marak parakataha.
Uni gimin, hai an·ching sakantian, skatang bol-wa·arangko nosto ka·e galjana, bol pangsa den·ode, pang 10-ko ge·dapskana, tipangenggipa chiring chibisikrangko tange rakkina aro A·chik a·songko nitoriri tangsekgilgil ong·atpilna, pilak ma·a-paarang, jong-ada, no-abirang, sorkari department-o kamko ka·giparang, mikkangchini namgnina apsan ku·monge, niksamsoa gnang da·aloni ja·ku de·na, ine ASPF dilgipa sakantikon ku·mongaha.
