Ampati, April 14, 2025: A·chik State Peoples’ Front (ASPF), Garobadha Regional Unit aro Garobadha Pulis Station-ni Pulisrang baksa Sonibar salo Garobadha bajaro cha·ani tarienggipa bakery-ko check ka·angaha.

ASPF Garobadha Regional Unit aro pulisrangni Garobadha bajaro cha·ani tarie palenggipa bakery-ko re·ange check ka·ani miksongara, manderangni complaint-ko man·e, cha·ani tarienggipa bakery nokona re·ange nieaha.

Uamangni re·ange nianio nikani gitade, Garobadha bakery-o cha·ani tarigipa manderang jakrango globe-rangko gangija aro skoo ganiako gangija tariengani gimin, jakrango globe-rangko gane aro skoko katipe cha·anirangko tarichina didiangaha.

Cha·anirangko tariengon, namgipa aro rongtalgipa chirangko jakkale, name aro rongtale tarichina didiangaha.Jedakode, cha·aniko bree cha·enggipa manderang maming sabisiko man·jana gita rongtale tarichina ASPF mikkrakatangaha.

Maina bang·bata cha·ani tarigiparangan rongtalgijagipa chirangko jakkale, cha·anirangko tarie palenga. Uarangko bree cha·enggipa manderangara sabisi man·ama man·jawa, uarangni gimin simsakgija skatang sera bera cha·anirangko tarie tangka man·na mangmang paltokenga. Uandakgipa cha·anirang mandena namgijagipa sabisirangko ong·atna man·a, ine ASPF Garobadha Regional Unit-ni President Sanju T. Sangma parakataha.

Uni gisepon manigija sera bera cha·anirangko tarie palgenchimode, mikkangchi rakbata ja·kurangko de·anggen ineba ASPF bakery-ni nokgipana mikkrakataniko on·angaha.