Tura, April 13,2025:Achik State Peoples’ Front (ASPF), Tura-ko Winter Capital songchina dabie April 12 tarik Sonibar salo chang 7-gipa tom·bimonganiko ba public awareness campaign-ko Dadenggre Civil Sub Division aro Pulis Station-ni ning·o donggipa Kalchengpara songo ong·atangaha.
Tom·anio mongsonggipa sokgiparangara ASPF, HQ-ni General Secretary aro Ukil Bernita R.Marak, Chief Organising Secretary Raksim Marak una agreba ASPF-ni dingtang dingtang Unit-ni dilgiparang, Nokma Sordar-rang aro bang·a songni manderang dongpae bak ra·angaha.
Winter Capital-na dabiengon, Winter Capital-ni miksongara maichim aro maina Garo Hills-o Winter Capital-ko nangenga, Bernitha Marak tom·bagipa manderangna talate on·angaha.
Marak-ni talatanga gitade, jensalo Meghalaya Assam a·dokoni ma·ekaha,1970 bilsio Meghalaya Autonomous State-ko man·chengaha. Ua somoio skanggipa Assembly-ni tom·aniko Garo Hills Autonomous District Council (GHADC), Tura-osa ong·atchengaha. Ua tom·anio Khasi, Jaintia aro Garo jatgittamni dilgiparang apsan ku·monge, Summer Capital-ko Shillong-o aro Winter Capital-ko Tura-o ong·atna tik ka·aha. jedakode, Meghalaya a·dok gimikon apsan development-ko tikatna man·gen, ia miksonganio pagitchamrang Tura-ko Winter Capital dakna tik ka·aha. Indiba, da·alo gitcham dilgiparangni ku·rachakaniko chu·sokate on·kujaengani giminsa, Tura-ko Winter Capital songchina dabienga” ine Bernita Marak aganaha.
“Da·alo an·chingni Winter Capital-ko nangnikanira Shillong gita apsan development-ko man·pana, poraienggipa chadamberangna namgipa skul aro college-rangko ra·bae on·china, Job Reservation Policy-o Garo-rangna chamgimin 40%-ko man·na, uandake dingtang dingtang gadango janggi tangani cholrangko man·na gita, Tura-o Winter Capital-ko songe on·na nangchongmotenga. Uni giminsa da·alo chinga Garo Hills-ni kona noksikrangona re·roroe, ia Winter Capital-ni bidingo talataniko on·enga, uni gimin A·chik a·songo songdongenggipa sakantian ia dabianio jak on·pachina aro ku·monganio apsan ku·rang on·pachina chinga mol·molenga” ine Marak aganangaha.
