Williamnagar, April 29, 2025:A·chik Organisation for Social Welfare (AOSW) HQ Simsanggre, Asanang-oni Samanda-ona dakanggipa ramako name tarijani a·sel ua rama gital tarigipa da·on nosto ong·engahani gimin ua ramako tarigipa MIDS Construction Company-ni kosako a·dokni PWD (Roads) Minister Prestone Tynsong-na badi ka·doataha.

AOSW-ni PWD Minister-na badi ka·e sedoatgipa chittio parakatani gitade, Asanang-oni Samanda-ona dakanggipa ramako niam gita tarijani a·sel ramarang da·on nosto ong·engaha aro ua ramako salanti re·ruraenggipa manderangna namen kenchakani ong·enga.

MIDS construction Company-ni rama tarianirang namja aro ramao Dollongrang, Culvert-rang, Retaining Wall-rang aro Highway Guardrail-rangko niam gita tarijaha aro mitam biaprangode tarisranggija donaiaha ine AOSW-ni President Gripping Marak parakataha.

Ua ramao tarigipa guardrail-rangko a·a nom·ao rakgija tariaha aro da·o wachini somoi sokbaengahani gimin ua ramako re·ruraenggipa manderangna namen kenchakani ong·enga ineba Marak parakataha.

Ua ramani bang·bata biaprangon retaining wall-rangko tarigija a·arangko cho·ahani a·sel bang·a biaprangon, West Garo Hills a·jani Rombagre aro East Garo Hills a·jani Rangmalgre jolrango a·arang rurongengaha. Ua biaprango a·arang rurongengani a·sel songni manderangnaba kenchakani ong·enga ine AOSW parakataha.

Marak-ni parakatani gitade, je dollongrangkon gital tarina nangachim, bang·batakon name tarijaha aro uan dal·dalgipa garirangnade rakjanaba donga.

“Ua ramako taria matchotaoni jasamangsan ong·engkua, da·on ua ramarang nosto ong·na a·bachengaha, badiaba biaprangode a·kolrara dakaha aro a·bri jolrangode a·arang rurongengaha, “ineba Gripping Marak parakataha.