Nongstoin, Sept 19, 2024:: West Khasi Hills a·jani Rambrai-Jyrngam Constituency-ni ning·o donggipa, Aradonga songoni Mawkrang songona dakanggipa ramarang namsrangjahani a·sel jolo songdonggipa manderang neng·nikanirangko man·tokenga ine A·chik Conscious Holistically Integrated Krima (ACHIK) Council parakatenba, manderangni namgnina ia ramako ta·raken taripile on·china a·dokni Skotong Minister Conrad K Sangma-ko didiataha.
ACHIK West Khasi Hills Regional Unit-ni dilgiparangni parakata gitade, Aradonga-oni Mawkrang-ona dakanggipa ramako salanti re·ruraenggipa jolni manderangnasan mongsonggipa ong·aigija, Mawkrang Picnic Spot dongani gimin dingtang dingtang biaprangoni manderang ia biapko nina re·batokenga.
Indiba “Ia ramani obosta da·o namsrangjani a·sel, chel·a biaprangoni ia biapko nina re·baenggipa manderang neng·nikaniko man·tokenga aro ia jolo tourism industry-na nangchakeaniko ong·atenga” ine ACHIK Council-ni dilgiparang parakataha.
Ia ramao a·kolrara dakahani a·sel salanti re·ruraenggipa manderangna neng·nikaniko ra·baanisan ong·aigija, kenchakanikoba ra·baenga aro ia ramao nalarang dongjani a·selba mikkarang waaode, chibolrara dakatenga. Unbaksana ia ramao a·dimurara dakani a·sel manderangni an·seng baljokanio nangchakeaniko ra·baenga ine ACHIK Council-ni dilgiparang parakataha.
Ia ramani obosta namsrangjahani a·selan km 4 ong·gipa ramana gong 300-ko gari bara gamna nangtokenga ine janapatenba, ia ramako PWD ta·raken taripile on·china ACHIK Council-ni dilgiparang didiataha.
