Tura, Nov.7, 2024: A·doko NPP sorkariko rikahani gimin, District Council election-oba NPP-ko seokode tangka paisarangko aro dingtang dingtang scheme-rangko man·bae on·gen aro GHADC-o kam ka·enggiparangna jaantian dormaharangko on·gen ine NPP-ni dilgiparang ku·rachakahani giminsa, 2020 bilsini GHADC election-o Garo Hills-ni manderang NPP-ko seokaha, indiba NPP-chi dilenggipa Garo Hills Democratic Alliance (GHDA) Executive Committee-ko rikchengaoni da·alona kingking maming dingtanganiko ra·bana man·jaha aro kam ka·enggiparangna dormaha on·na man·gija ja 35 batpilaha ine Gambegre by-election-o susaenggipa Trinamool Congress (TMC)-ni candidate Ma Sadhiarani Sangma parakataha.

Ia Gambegre by-election-o joltango aro songtangtango ong·enggipa obostarangko badia dol nigrike kam ka·e on·na man·gen nigrike dilgipako seokchina Ma Sangma Gambegre constituency-ni manderangko didiangaha.

“A·dok sorkari District Council-ko niatgenchimoba, an·ching pilakni gitan namroro silroroani pal batesa namjabatroroenga. MDC election-ni somoio NPP-chi dilenggipa MDA sorkariko rikahani gimin District Council-oba tangka paisarangko aro scheme-rangko man·bae on·an baksa kam ka·giparangna jaanti dormaharangko on·na man·gen ine ku·rachakenba, NPP-ni candidate-rangko seokchina manderangko didiahani gimin, Garo Hills-ni manderang uamango ka·donge, NPP candidate-rangko seokaha aro GHADC-o EC-ko rikaha. Indiba da·alo mai ong·enga, GHADC-o kam ka·enggiparang ja 35 batpile dormaharangko man·tokkujaenga, Garo Hills-ko namroro silroroatna ma·mong sorkarini chamatgipa tangka paisarangko uamang jakkalsretenga. Uni giminsa Gambegre constituency-o songdongenggipa manderangko anga mol·molenga. Ia election-o uamangni tol·pinikanirangko bebe ra·jachina aro an·tangtangna chanchie namgipa dilgipako seokchina” Ma Sangma mol·molangaha.

“Da·ode na·simang sakantion mobile phone-rang donga. Kakketko Google ka·e sandie nibo aro ma·sie ra·bo. Na·simang an·tangtangan dilgipako name basejaode, ja·mano sikkimgrn” ineba TMC candidate aganangaha.

Gambegre constituency-o namroro silroroani donggijako nikahani giminsa ia constituency-o namroro silroroaniko ra·bana miksonge ia by-election-o susaenga, namgipa dilgipako seokanide, na·simangni jakon ong·a. Election-o an·tangtangni jaksiko tangkana pale cha·ode, salsa salgnisan cha·na man·gen, indiba bilsi 5 kal·ake roako man·skagnok ine Ma Sangma parakangaha.

“Ia by-election-o gipin candidate-rang, ku·mikchetanirangko daktokenga. Indiba uamangni ku·mikchetanina an·tangtangni vote-rangko on·nabe. Na·simangni wilwilao mai obosta ong·enga, uko niesa badia dilgipa baksa bakrime na·simangni neng·nikanirangko namatna man·gen, ua dilgipakosa seokbo” ine Ma Sadhiarani Sangma aganangaha.