Baghmara, Feb 27,2025: South Garo Hills a·jani Social Activist Greneth M.Sangma, an·tangko doctor ine tol·enba, manderangko cha·bokna jotton ka·gipa mande saksani kosako South Garo Hills a·jani Baghmara Police Station-o badi (FIR) ka·doangaha.
Koborna u·iatani gitade, mande saksa Hirak Sangma minggipa an·tangko Baghmara Civil Hospital-ni doctor ine tol·enba, Garo Hills-ni dingtang dingtang Health Centre-rango kamrangko on·gen ine manderangoniko tangka dabie ra·engachim.

Ua mandeni kosako FIR ka·ani ja·man, ua mandeara doctor-ba ong·ja aro Baghmara Civil Hospital-o maming bak dongja ine ma·sina man·aha.

Greneth Sangma-ni FIR-o janapatani gitade, ua mande, Chokpot CHC-o kam on·gen ine me·chik saksaoniko tangka dabiaha aro dingtang dingtang hospital-rango kamrang donga ine an·tangni Whatsapp Status-o done, manderangko cha·bokna jotton ka·engachim.
“Ia mandeni bidingo am·sandianiko dakon, ua ru·uta somoirangonin an·tangko doctor ine tol·enba, manderangoniko cha·boke ra·na jotton ka·aha ine ma·sina man·aha.

Uni gimin indakgipa a·selni bidingo manderangna mikrakatanirangko on·na nangenga aro indakgipa obostarang ong·taijana gita ua mandeni kosako ta·raken ja·kuko de·na nanga, ine Greneth Sangma parakataha.