Nongstoin, April 28, 2025: Chang 4-gipa All Meghalaya Muster Roll Progressive Workers’ Union (AMMRPWU)-ni General Meeting ba tom·bimonganiko re·anggipa April 26 tarik Sonibar salo Nongstoin-o donggipa Bishop House Hall-o ong·atangaha.
Ia tom·bimonganio Garo HIlls aro Khasi-ni dingtang dingtang sorkari department-rango Muster Roll kamko ka·enggipa manderang sak 200-na baten bak ra·angtokaha. Indake ia 4-gipa tom·bimonganio AMMRPWU-ni dabianirangko a·dok sorkari chu·sokate on·kujaengani gimin jinma apsan chanchirime, a·dokni Skotong Minister aro Labour Minister-na gisik ra·atpiltaiani chittiko see on·angtaina tik ka·angaha.
AMMMRPWU-ni mongsonggipa dabianirangara, Meghalaya Regular Casual Worker Scheme (MRCWS)-ni 1996 bilsio dongimin niam gita muster roll-rangna 50 percent on·gipa Group D Post-o department-ni authority-rang on·jaengni gimin aro muster roll-rangko Unskilled, Semi Skilled, Skilled aro Highly Skilled ge·bri category-rango senior ong·ani kri somoi gita ra·dojaengani gimin, unbaksana dingtang dingtang man·gnirangko on·jaengani gimin, mikkangchi rakbata ja·kurangko de·angna chanchiangaha. Unbaksana muster roll-rangni retire ba pension ong·ani ja·mano maming man·gnirang dongjani gimin bang·a bang·gija compensation-ko changsa mang mang on·pachina aro retire ong·anggipa mandeni jikgipa ba depante ba demechikko muster roll-ni kamo rakkichina dabianiani ong·achim.
Indake tom·anio gital dilgiparangkoba seokangjolaha, uamangara Hubert Kharbani President, Dibinan R. Marak Vice President, Nazarius K.Lanong General Secretary, Ayden John Laitthma Assistant Secretary, Euginia Wallang Treasurer, John Kennedy Lyngkhoi Publicity Secretary aro Executive Member-rangara Rajest Marbaniang, Ibanri Kharbani, Rudi L.Nonglait, Wanda Wanniang, Etchaswar Marak, Arnesh A.Sangma, Henrybirth M.Marak, Santosh Hajong, Hepney R.Marak, Polsing Momin, Civil Momin, Deligent M.Sangma, Bergist Momin, Jestarwell Thonghi, Ritngenlang Khongdup, Dominic Lyngdoh aro Menjush Momin, iarangan AMMRPWU Central Body-ni Executive Member-rang ong·a.
