Imphal, Jun 22, 2025: Re·anggipa June 12 tariko, London-ona bilangenggipa Air India (AI), Sildoreng Ahmedabad-o ga·ake a·sel ong·anio sianggipa sakgipin Cabin Crew member Nganthoi Sharma Kongbrailatpam-ni manggisiko Robibar salo, Manipur a·dokni skotong Imphal songjinmaona ra·baaha.

Ia a·sel ong·aonin Nganthoi Sharma Kongbrailatpam-ni ma·drangrang, iani bidingo koborna senge dongengachim aro indaken Sonibar salo, uni manggisiko DNA porikka ra·e nianio meliani gimin, nokdangni manderangna koborko on·ataha aro Robibar salo, uni manggisiko Ahmedabad-oniko Imphal-ona ra·baaha.

Bilsi 22 ong·gipa Nganthoi-ni manggisiko uni ma·drangrang Robibar salo, Imphal Airport-o ra·chaksoaha.

Sianggipa Nganthoi Sharma Kongbrailatpam, 2023 bilsio Air India-o Air Hostess-ni kamko man·chengaha ine uni abitang kobor ra·timhiparangna aganaha.