Tura, June 5,2025: A·chik Holistic Awakening Movement (AHAM) Bawegre Sub Unit, re·anggipa June 2 tariko niamgri skatang Garo Hills-ni bolrangko Assam a·dokona, West Garo Hills aro North Garo Hills a·ja gita napake salangengani gimin, sandirokaniko dakchina GHADC-ni Chief Forest Officer (CFO) aro Conservator of Forest (Social Forestry and Environment) Garo Hills Region-na lekka sedoataha.

AHAM Bawagre Sub Unit-ni sedoatani gitade, Forest Conservation Act aro GHADC-ni niamko ja·rikgija skatang niamgri maming nangchongmotgipa lekka ba Transit Pass (TP) gri bolrangko salangengani gimin janapatengon, Manggakgre aro Jamgondagre jolrangoniko Tosinpara rama gita Bajengdoba-ko napake, Assam a·dokona salangenga. “Chingni chanchipani gitade, ia bolrangko Assam a·dokona niamgri badingsrukna skang dikdikprak Chambildam-o stockpiling ka·enga” ine AHAM Bawegre Unit parakataha.

Indake niamko pe·e bolrangko Assam a·dokona badingsrukanirang batroroengani gimin, AHAM Bawagre Sub Unit jegalatenba, uandakgipa kamrangko champengatchina CFO-ko didiataha.

AHAM Bawegre Sub Unit-ni President Briwat Sangma-ni parakatani gitade, niamgri bolrangko badingsrukniara a·dokni dongimin niamko pe·asan ong·aija, indiba a·dokni buring bolgrimrangko nosto ka·ani ong·a.

Indake Garo Hills-ni bolrangko niamgri Assam a·dokona badingsrukatgiparangni kosako, Indian Forest Act aro Forest Conservation Act aro Environmental Protection Act aro GHADC-ni niamo pangchake raka ja·kurangko de·angchina, AHAM Bawagre Sub Unit didiataha.