Raksamgre, May 27, 2025: A·chik Holistic Awakening Movement (AHAM) Bawagre Sub Unit, Sombar salo Bajengdoba C&RD Block Office gitalko nokdonggae on·angani somoio a·dokni Skotong Minister Pa Conrad K Sangma-ko gronge, West Garo Hills a·jani Raksamgre Civil Sub Division-ni ning·o donggipa, Nengbapara, Public Health Sub Centre-ko ta·rake rike on·china dabian baksa nipiltaianiko dakchina lekka sedoataha.

AHAM Bawagre Sub Unit-ni seatgipa chittio janapatani gitade, Health and Family Welfare Department, batanggipa 2024 bilsini May 12 tariko Nengbapara Health Sub Centre-ko rikna on·gipa biapko niahani gimin, AHAM namen kusi ong·ahachim.

Indiba development-ko rikna a·bachengatgen ine ka·rachakgenchimoba, da·alona kingkingan,, Nengbapara Public Health Sub Centre-ko rikna a·bachengatkuja ine AHAM Bawagre Sub Unit-ni President Briwat Sangma parakataha.

Jolo songdongenggipa manderangni saa ding·an salrangko sana bannaniko on·anio neng·nikanirangko komiatna gita, Nengbapara Public Health Sub Centre-ko ta·rake rikchina changsatai, AHAM Bawagre Sub Unit-ni dilgiparang a·dokni Skotong Minister Pa. Conrad K Sangma-ko molmolataha.