Tura, June 11,2025: Re·anggipa June 2 tarikosan, AHAM Bawagre Sub Unit niamgri Forest Conservation Act-o dongimin niamko aro GHADC-ni niamko pe·e, Garo Hills-ni bolrangko sriksrik cha·ue, West Garo Hills aro North Garo Hills-ko napake Assam a·dokona salangengani gimin, GHADC-ni Chief Forest Officer-na aro Conservator of Forest, Social Forestry aro Environment, Garo Hills Region Tura-na sedoatahachim.

Indiba iako sedoatani ja·manba, June 9 tariko GHADC-ni Forest Department aro AHAM Bawagre Sub Unit am·sandianiko a·bachengaha aro ia am·sandianiko dakon, Assam a·dokona niamgri bolrangko cha·ue, Tosinpara aro Kimdegre rama jolrango dane ba tom·e donenggipa bolrangko rim·taiaha, ine AHAM Bawegre Sub Unit-ni President Briwat Sangma u·iataha.

Ia bolrangko GHADC-ni Forest Department aro AHAM Bawagre Sub Unit ra·sekaha aro Forest Office-na pakwatataha, ine Sangma parakataha.