Williamnagar, Oct 29, 2024: All Garo Hills IV-Grade Govt. Employees Association, chang 7-gipa General Meeting-ko re·anggipa October 26 tarik Sonibar salo Williamnagar DRDA Hall-o ong·atangaha.
Association-ni President Janiman T. Sangma biapko ra·e tom·aniko a·bachengna skang an·tangan Isol-o bi·e, sokbagipa sakantikon rimchaksoaha. Chanchina donsogimin agenda-rangko Association-ni Secretary Decem Marak poraiaton, jinma namnike ra·chakaha.
Association-ni General Meeting-o jinma tik ka·angani gitade, sorkario kam ka·giparang an·tangtangni man·gnirangko on·china a·dokni Skotong Minister-na memorandum ba lekka sedoate dabiangna tik ka·angaha.
Association-ni nangchongmotgipa dabianina miksongenggiparangara Pay Revision-ko re·baenggipa 2026 bilsini January 1 tarikoni on·na nanga. NPS-ko GPF-ona ra·bana nanga. Compassionate ground aro pension level-ko on·taipilna nanga. Da·o man·enggipa Medical Allowance gong 1000-ko gong 5000-ona bariate on·na nanga. Je Peon-an qualified ong·ode LDA-ona aro bilsi 15-niko bilsi 7 ong·ode, uko upgrade ka·na nanga. Winter Allowance-ko Garo Hills-oba on·na nanga. Winter aro Summer Revise-ko on·na nanga. Sorkario kam ka·giparangna over time allowance-ko on·na nanga. Hill Allowance-ko gong 500-oniko gong 3000-ona bariate on·na nanga aro House Rent-ko Shillong-o jedake on·a, apsandaken Garo Hills-oba on·na nanga, ine Association memorandum-ko see Skotong Minister-na on·na jinma tik ka·e ra·chakangaha.
