Tikrikilla, June 4, 2025: A·chik Dedicated Integrity Leaders (ADIL) Tikrikilla Regional Unit, Tikrikilla C&RD Block Office-o Gram Sevak-ni kamko ka·enggipa Manjeng Bernard Sangma-ni kamko jegale, uni kosako BDO-na badi ka·doangaha.
ADIL Tikrikilla Regional Unit-ni parakatani gitade, Gram Sevak Manjeng Bernard Sangma, Gondagre aro Rongsai songrango, PMAY scheme-ni nokrangko rikna man·gipa kangal manderangoniko changni chang tangka dabie ra·aha. Ua geo-tag ka·na aro nok rikankrangko nirokna re·anga changatian PMAY scheme-ni nokko rikenggipa kangal nokdangrangoniko tangka gong 500-oni 5000-ona kingking dabie ra·engachim.
Iani bidingo bang·a complaint-rangko man·soe ADIL, PMAY scheme-ni nokko rikgipa manderango sing·sandianiko dakon, sakkirang baksa mikrontangchi nikgipa manderangba Gram Sevak-ni tangka bi·drae ra·ako parake on·aha.
Songni manderangni ADIL-na badi ka·atani gitade, Gram Sevak pangnan an·tangni kamrangko nirokna re·anga changati, PMAY nok rikna man·gipa manderangoniko tangka dabie ra·engachim.
“Chinga, ua Gram Sevak-ni kosako niam gita raka ja·kurangko de·e, sandianirangko dakchina, BDO-ko didiatenga” ine ADIL Tikrikilla Regional Unit, parakataha.
Unbaksana, MGNREGA-ni VEC Secretary-ni giminba, complaint-ko man·soaha. Uaba PMAY nok man·gipa kangal nokdangrangoniko tangka gong 500 ka·e dabie ra·engachim.
Iani bidingo sandianirangko dakenba, raka ja·kuko de·angchina ADIL dabiangaha.
“Chinga indake ong·gija kam ka·enggipa official-rangni kosako namedake sandichina aro dos dakgipa manderangko niam gita sasti on·china mol·molenga” ineba ADIL parakataha.
