Dadenggre, April 12, 2025: West Garo Hills a·jani Dadenggre jolo songdongenggipa manderang bang·batan, Jio SIM-ko jakkaltokengon, Network aro Internet namjani a·sel dingtang dingtang kamrangko ka·anirango namen neng·nikaniko man·tokengani gimin, 4G Jio Network-ko 5G-ona ra·doate on·china, A·chik Conscious Holistically Integrated Krima (ACHIK) Dadenggre Regional Unit, North Western Zone, Shillong-o donggipa Reliance Jio Infocomm Ltd-ni Appellate Aithority-na sedoataha.

ACHIK Council-ni Reliance Jio Infocomm Ltd-ni Appellate Aithority-na sedoatgipa chittio janapatani gitade, Dadenggre jolo songdongenggipa manderang Jio Network man·jani a·sel dingtang dingtang kamrangko ka·anio namen neng·nikanirangko man·tokenga, ine parakatenba, Jio service namjae, call ka·mittingrangon off ong·angaia aro internet namen ka·sinani gimin, poraienggipa chatro chatrirang, office-o kam ka·giparang aro ramram manderang neng·nikaniko man·enga ine ACHIK Council Dadenggre Regional Unit-ni President Kronosh B.Sangma parakataha.

A·dokko namroro silroroatna kamrangko ka·engon, Dadenggre jolni manderang network-ni a·sel namen ja·manchakenga. Da·o donggipa 4G network name man·jani a·sel, salantio nangenggipa kamrangko ka·anio ja·machakaniko man·enga ineba Sangma parakataha.

Dadenggre jolo indakgipa neng·nikanirangko chagrongna nangengani gimin, Jio 4G network-ko ta·raken 5G-ona ra·doate on·china didiatenba, iako chu·sokate on·anichi Digital-ni kamrangko ta·rakbatasan ong·aigija, jolo namroro silroroatani kamrango on·gilaniba ong·gen. Reliance Jio Infocomm Ltd. Appellate Authority-ni ku·rachakanian, India a·song gimiko namgipa service-ko on·na miksonge a·bachengatani gimin, Dadenggre jolo neng·nikanirangko ta·raken nirokatgen ine ACHIK Dadenggre Regional Unit, ka·donganiko parakataha.

Ua apsan salni bakon, ACHIK Dadenggre Regional Unit-ni dilgiparang Dadenggre SBI-o Branch Manager dongjae bang·a kamrangon neng·nikaniko man·tokengani gimin aro Dadenggre-o donggipa Automate Teller Machine (ATM) nosto ong·ako ru·uta salrangna tarigija donchipengako ta·raken taripile on·china agangrikangon, iani bidingo ta·rake kamrangko ka·na gita ku·rachakataha ine ACHIK Dadenggre Regional Unit-ni dilgipa parakataha.