Tura, Mar 30,2025:A·chik Conscious Holistically Integrated Krima (ACHIK) Council-ni dilgiparang Sukrobar salo NEHU Tura Campus-ni gital Pro Vice Chancellor (PVC) Dr.Fameline K.Marak aro Post Graduate Students’ Union (PGSU)-ni dilgiparangko grongeaha.
ACHIK Council-ni dilgiparang, saksa A·chik ma·gipa NEHU Tura Campus-ni PVC ong·e, chubata gadango kamko ka·na gita cholko man·ahanina namen kusi ong·aniko parakangaha.
“A·chik jatni namroro silroroanina nama miksongao ja·ku de·anina kusi ong·bee, mittelpilaniko on·na gita chinga gital PVC-ko grongeaha” ine ACHIK Council-ni General Secretary Happynews Marak u·iataha.
Ua apsan salon,ACHIK Council-ni dilgiparang, PGSU-ni dilgiparangko gronge, A·chik jatni namgnina apsan ku·monge kamrangko ka·angna chanchirimaniko dakangjolaha.
Uamangni gonggrike agangrikanio NEHU-ni PVC, ACHIK Council-ni dilgiparangna nama ku·pattianiko on·atan baksa, ACHIK Council maikai mikkangchi nama miksonganina re·mikkange kamrangko ka·anirango chu·sokgipa ong·china nama sikaniko aro bi·chakaniko on·ataha aro gisik ka·tong gimikchi Dr.Marak, ACHIK Council-ni dilgiparangko mittelatskaha.
Uandake, apsan salon, PGSU-ni dilgiparangko gronge, golpogrikanio poraienggipa A·chik chadamberangni namgnina mikkangchi ku·mong kamrangko ka·angna, kusi ong·e, ku·mongrimaniko dakangaha, ine Marak parakataha.
