Dadenggre, Nov.9,2024: A·chik Conscious Holistically Integrated Krima (ACHIK) Council HQ, Tura aro Dadenggre Regional Unit, Dadenggre Civil Sub Division-ni ning·o donggipa Dichinggre songo Jal Jeevan Mission (JJM)-ni kamrangko matchotgija donengani bidingo ta·rake sandianiko dakchina, West Garo Hills a·jani PHE Division Tura-ni Additional Chief Engineer-na sedoataha.

ACHIK Council-ni parakatani gitade, Dichinggre songo JJM-ni kamrangko matchotaha ine Report-ko on·ahani gimin, Dichinggre songona re·ange nion, bang·a kamrangan matchotgija dongakosa nikna man·aha. Uni a·selan songni manderang namgipa ringani chiko man·jae neng·nikanirangko chagrongtokenga.

Ma·mong sorkari songni manderangna namgipa ringani chiko songanti nokantiona sokate on·na gita miksongesa, JJM Scheme-ko India a·songo ra·gataha. Indiba ma·mong sorkarini on·atgipa JJM Scheme-ni kamrangko matchotgija donaniara songni manderangna dal·bea gimaani ong·a aro songni manderangko cha·bokaniba ong·a, ine ACHIK Council HQ, Tura-ni President Kebil A.Sangma parakataha.

Ma·mong sorkari Dadenggre jolo songdongenggipa manderangni namgnina, ta·rake sandianiko dakenba, JJM-ni kamrangko matchotatchina contractor aro official-rangni kosako niam gita ja·kuko de·china ACHIK Council didiataha.

Meghalaya a·doko JJM-ni kamrang chu·sokaha, ine boksisrangko man·pilaha, indiba songona re·ange nigenchimode, song ge·saoba JJM-ni kamrangko chu·sokate on·a dongkuja, tol·e report-rangko tariani a·selsa boksisrangko man·aha ine nikna gita man·aha.

Garo Hills-ni bang·bata songrangon, JJM-ni kamrangko matchotgija donengani gimin dingtang dingtang NGO-rang, Social Organisation-rang aro Social Activist-rangna songni manderang badi ka·anirangko man·skaenga ine ACHIK Council parakataha.