Tura, Nov 28,2024: A·chik Conscious Holistically Integrated Krima (ACHIK), HQ Tura adita salrangna skang Meghalaya Indigenous Minority Tribals Forum (MIMTF) dolni Garo Hills Autonomous District Council (GHADC)-ni ning∙o dingtang “Regional Council”-ko on·china dabianiko jegalatenba, Ma·mong sorkarini Tribal Affairs Minister Jual Oram-na chitti sedoataha.
Indian Constitution-ni ning·o Sixth Schedule-na on∙gimin niamrango pangchake GHADC, A·chik manderangna nangchongmotgipa ong·a aro Garo Hills-o songdongenggipa pilak jatrangna kamrangko ka·enga. GHADC-ni niamo pangchake, Sixth Schedule-ni ning·o songdongenggipa tribal manderang jatsa jatgipin baksa ku·mong nangrimani, kakket ong·ani aro tribal manderangni daka rikanirangko ripinggipa ge·sa skie on·ram ba niam bidikko ripinggipa rongdik ong·a. Uandake, District Council-ni ning∙o ga∙akgipa biaprango niamchi kamrangko ka∙na gita dakchakaniba ong·a ine ACHIK Council HQ-ni President Kebil A.Sangma parakataha.
ACHIK, GHADC-ni ning∙o dingtang Regional Council-ko maming dakeba bikotna on·jawa raken ja·ku de·anggen, Garo Hills-o songdongenggipa A·chik manderang, GHADC-ni niamo pangchake a·dok chigako nirok simsakani, jatni niam retiko ripingani, jattangchi sason ka·ani aro melie nangrime donganiko ma·ekatna miksongani ong·a. GHADC-ni nong·o Regional Council-ko on·genchimode, GHADC-na on·gimin bilrangko bilgriatani ong·gen ine ACHIK Council Tribal Affairs-ni Minister-na seatgipa chittio janapataha.
ACHIK Council, maming dakeba Regional Council-ko GHADC-oniko ma·ekatna on·jawa, raken dakgrikgen aro ACHIK, iana kimkim chadenga. Uni gimin a·dok sorkari aro Ministry of Tribal Affairs, Meghalaya a·dokni tribalrangko aro Garo Hills-ni manderangko GHADC-ni ning∙o dingtang Regional Council-na dabianiko maming dakeba ra·chakjachina, ACHIK Council didiataha.
