Tura, Mar 3,2025: Tura-ni MDC aro BJP-ni State Vice President Bernard Marak-ni Robibar salo parakatani gitade, Job Card-ni tangkarangko man·jaengani a·selara a·dok sorkari, dingtang dingtang  block-rangona tangkarangko  watatjaengani a·selsa songo noko Job Card kam ka·giparang an·tangtangni man·na nangenggipa tangkarangko man·jaenga. 

Ma·mong sorkarini on·atenggipa pilak scheme-rango gamna nangengggipa tangkarangko BJP sorkari on·mantokaha, indiba a·dok sorkarisa, tangka paisarangko somoi gita block-rangna watatjaengani a·selsa job card-ni tangka paisarangko man·jae neng·nikanirangko man·tokenga ine Bernard Marak parakataha.

Ma·mong sorkari pilak scheme-rangon, 90% percent tangkarangko gamenga, indiba 10% percent-ko a·dok sorkari gamna nanga. Mitam manderang ma·mong sorkarioni tangkarangko on·atjaenga ine matnangtokenga, indiba a·sel chongmotde, a·dok sorkarisa manderangni man·na nangenggipa job card-ni tangkarangko block-rangna on·atjaenga ine Marak parakatskaha.

Manderangni man·na nangenggipa tangka paisarangko ma·mong sorkari cha·bokaha ine a·dok sorkari songni manderangko togigenchimoba, manderangni man·na nangenggipa tangka paisarangko ma·mong sorkaride somoi gitan on·atenga. Block-rang somoi gita kam matchotgimin bill-rangko on·atani sal 15 gisepon a·dok sorkari bill-rangko gamatna nanga, ineba Marak janapataha. 

Block-rang bill-rangko somoi gita on·na nanga, indiba gitcham bilsirangni bill-rangko online gita update ka·jaenga. Muster roll-rango bang·a manderangkon absent seengani gimin iarangko Block-rango name am·sandina nanga, a·dok sorkari maming dos dongjana gita donatgimin kamrangna tangka paisarangko watatosa, block-rangde work order-rangko on·na man·aia ineba Tura MDC parakataha.

NREGA-ni ning·o job card donggiparang, dingtang dingtang neng·nikanirangko man·enga, indiba bang·bata VEC Secretary-rangko election ong·ate seokgija, jinma songesa on·engani gimin, job card kam ka·giparangni tangka paisarangko man·tokjaoba jrip dongtokaia. Kam ka·ani hajiarangko somoi gita man·jaengani gimin dingtang dingtang songrangoni bang·en badi ka·anirangko man·soaha, maina gitcham bilsirangonikon manderangni man·na nangkuenggipa tangka paisarangko man·tokkujaenga. “Iani bidingo chinga am·sandion, job card kam ka·giparangni hajirarangko on·na gita a·dok sorkari, tangka paisarangko block-rangona watatjaenga ine ma·sina man·aha,” ine Tura-ni MDC parakataha.