Tura, Oct 7, 2024: Salgnina kingking mikkarang dondikgija waani a·sel chi bananio nok jamrangko chi man·pakange, nok jam gri duko ga·akenggipa Dalu jolni South Kujikura aro Dapgre songni manderangko Tura-ni Durama Imbama Norimbi Dikkimbi A·chik Ma·giparang (DINDAM) dolsa Robibar salo relief camp-rangona re·ange, adita cha·a ringani, ganna chinanirang aro gipin dingtang dingtang bosturangko ra·ange dakchakaniko on·etokaha.
DINDAM-ni President Jaynie Sangma-ni koborna u·iatani gitade, South Kujikura-ni nokdang ge 21 aro Dapgre songni nokdang ge 37, chu·gimik nokdang ge 58 nok jam gri duko ga·aktokenga. Duko ga·akenggipa manderang, Dapgre A·du LP Skul noko ma·chaktokenga, uamangko sorkari side-ni gita da·odipet re·ange grongea dongkuja, indiba district administration-ni on·atgipa adita cha·a ringanirangko man·sotokaha. Indake ong·engon, DINDAM dolan, skanggipa uamangko grongechengaha.
Relief Camp-o dongenggipa manderangoni gisik sokmangijagipa bi·sarang aro bi·sa bakgitchak donggipa ma·giparang namen neng·nikaniko man·enga. Uni gimin uandakgipa bi·sarang aro ma·giparangna dingtangmancha sorkarini gita dakchakaniko nangenga ine Jaynie Sangma parakataha.
