Tura, Nov 19,2024: Garoland State Movement Committee (GSMC), CEC HQ Tura, A·chik jat ong·gijagipa rori saksa, Jitupan Borah minggipa, A·chik me·chikrangni mingsinggipa ganna ‘Dakmanda’-ko longpant sike, an·tangni namgnina video tarie aro photo ka·e mesokatan baksa, re·anggipa November 8 aro 9 tariko ong·atanggipa A·chikrangni dal·batgipa ‘Wangala Festival’-oba, A·chikrangni gitoko ganna jakkalgipa ‘Rikgitok Rikmatchu’ aro sko kotipo potna jakkalgipa ‘Do·me’-ko jakpongo gane mesokataniko jegalatenba, Monggolbar salo GHADC-ni Deputy CEM aro I/c Land & Revenue-na badi ka·doangaha.

“A·chikrangni aganritingbaani gita me·asarang pante sokahaon, ma·ni pani noko dongja, ‘Nokpate’-osa tusia aro je kamkoba Nokpante-osa skie ra·a. Uni gisepon, uamang maiba kam nangana ma·ni pani nokchi re·angon, ma·ni noni ganding chindingrang a·ao ga·ako nikon, jakchi kolamja aro rim·malja go·olchi jotkepesa donatronga ina. Uni gisepon rori Jitupan Borah, A·chikrangni ripingbaenggipa aro ja·rikbaenggipa niamko pe·e, me·asarangni ganmalgijagipa, A·chik me·chikrangni Dakmanda-ko longpant aro coat sike gananiara ra·chakna man·gija ong·a aro A·chik jatni gitoko gangipa Rikgitok Rikmatchu aro Do·meko jakpongo ganne niamko pe·aniara, A·chik jat aro a·songna dal·bea ‘Dai’-ko gamna nangao ga·akaha. A·chikrang maming saloba jakpongrango Do·meko potja, kotiposa pota. Unbaksana, uni Dakmanda aro Rikgitok Rikmatchu-ko ganne, video aro photo-rangko ka·e, je je Social Media-rango wataha ba upload ka·ahachim, uarangko ta·raken den·galpilna ba ra·galpilna nangchongmota. Una agreba, je mandean A·chik jatni ganna chinaniko ong·gija dake, una longpant aro coat sike on·achim, uni kosakoba jatni niamo pangchake bichal ka·enba raka sastiko on·na nanga” ine GSMC dabiangaha.

Uni gimin, je manderangan A·chik jatni ganding chindingko ong·gija dake jakkalahachim, uamangni kosako raka ja·kuko de·enba sastiko on·china, GSMC CEC Tura, A·chik jatni palo badi ka·doangenba, ta·rake sing·sandianiko dakchina GHADC-ni Deputy CEM-ko didiangaha.