Tura, Dec 12, 2024:Garo Students’ Union (GSU) aro GSMC dolgni bakrime, re·anggipa Monggolbar walo niamgri Rerapara buring Reserve-oniko bol cha·ugiparangko rim·aha. Bol cha·ugipa manderang NGO-rangko niksoe, uamangni gario gatgimin bolrangko gale kataha aro ua manderangni jakkalenggipa Mahendra Pickup number plate dongjachim.
NGO-rangni u·iatani gitade, gario gatgimin bolrang piece 12 donga aro gario gatkugijagipa bolrang a·damo bang·en dongkuengachim. Uandake NGO-rangni rim·a man·gipa bol aro gariko Butbar salo GHADC-ni Range Forest Office-na pakwataha aro a·damo dongkuenggipa bolrangkoba sale ra·echina didiataha.
Uandake niamgri bol cha·ugiparangni kosako raka ja·kurangko de·e sandianiko dakchina NGO-rang, GHADC-ni Range Forest Officer-ko mol·molataha.
