Tura, Nov 26,2024:Smart Value, Free Food Distribution dolko a·bachengaoni da·o bilsi 25 gapaniko India a·songni dingtang dingtang biaprango maniengon, Tura-oba Monggolbar salo skanggipa changna Smart Value-ni bak gita Dobasipara Balsrigittim-o tom·aniko ong·ate, gittimni manderangna ‘Free Food Distribution’ ba indin cha·anirangko suale on·angaha.

Ia Smart Value, Free Food Distribution dolrang ba branch-rang Indiani dingtang dingtang a·dokrango gnang, indiba Meghalaya a·dokode Tura-o office ge·sasan dongaia ine Garo Hills-ni Smart Value dolni officer In-charge Clever Marak aganaha.

Ia Smart Value-ara India sorkarini recognised ka·gipa dolsa songsalni namgnina kam ka·gipa ong·a aro iani miksongara songni nokni manderangna cha·anirangko indin suale on·ani ong·a, maina bang·bata songrang aro gittimrangon, chu·onga cha·a ringanirang gri dongenggipa manderang gnang, uamangna cha·anirangko sualgipa dol ong·a. Uni gimin, Smart Value Free Food Distribution program-ko ong·ate, songni nokni manderangna dakchake on·gipa dol ong·a. Iasan ong·aigija Smart Value-ni gita, tree plantation program aro agriculture-koba jako ra·e, dingtang dingtang biaprang ba songrango dakchakaniko on·na miksongani ong·a ineba Clever Marak aganaha.

Indake ia nambegipa program-ko ong·ate, gittimni manderangna cha·anirangko suale on·angani Smart Value, Free Food Distribution dolko Balsrigittim Development Committee-ni Secretary Wenrol A.Sangma mittelpilangskaha.