Shillong, Nov 18, 2024: North Eastern Hill University (NEHU)-ni Vice Chancellor Prof. Prabha Shankar Shukla-ko kam watchina aro University-ni Registrar aro Deputy Registrar-ko kam ra·galchina dabie chatro chatrirang sima ari dongija Shillong aro Tura campus ge·gnio jingjengataniko dakengon, NEHU-ni VC kamtangko wate re·angjaskal jingjengataniko dontongjawa ine North Eastern Hill University Students Union (NEHUSU) Shillong aro NEHU Tura Campus-ni chatro chatrirang parakataha.
Unbaksana NEHU Shillong aro Tura Campus-na Prof. Shukla-ni songe on·gipa Pro Vice Chancellor (PVC)-ko jegale, gital VC-ni jakchi songe on·gipa PVC-kosa ra·chakgen, ine parakatenba, dontonggija jingjengataniko dakengani gimin, NEHU-ni VC Prof. Shukla, sal 13-na chutti ra·angskaaha.
“Chingni mongsonggipa dabianide, jegitaba NEHU-ni VC kam watna nanga aro ua an·tangni namgija kamko ka·ahani gimin, University-ko wate re·angna nanga” ine Robibar attamo, NEHUSU, KSU NEHU Unit aro NEHU Tura Campus-ni dilgiparang parakataha.
“Ian chingni mol·molani ong·ja, indiba chingni nangnikaniko mesokanisa ong·enga. Ia dabianiko chu·sokatjaskal chingni okumu chake jingjengataniko dontongjawa aro bilakbate dabiangkugen” ine NEHUSU, KSU NEHU Unit aro NEHU Tura Campus-ni chatro chatrirang parakataha.
Re·anggipa sal 12-na kingking chatro chatrirang jingjengatengon, NEHU-ko chu·gimik chipatsrangahani a·sel University-ko chalaianio bang·a neng·nikanirangko chagrongna nangengaha.
“Chinga maming dakeba nom·e on·jawa aro jena kingking Prof Shukla, University-ko wate re·angkuja maming dakeba neng·takjawa” ineba NEHUSU aro KSU NEHU Unit parakataha.
Prof N Saha-ko NEHU-ni Acting VC dake songaniko ra·chakengon, uni agangipa kattarangko pilak chatro chatrirangan ra·chakahaoba, VC-ko ra·galsrangkuja dipet, NEHUSU aro KSU NEHU Unit, dakgrikaniko dontongjawa ineba parakataha.
Indake NEHU-o ong·enggipa obostarangko sandirokna gita Education Ministry, member sakgniko Inquiry Committee songe, sal 15-ni gisepon report-ko on·china, Committee-na ge·etaniko on·ataha.
