Guwahati, Aug 25, 2024: Assam a·dokni Nagaon District-o donggipa Dhing minggipa songo bilsi 14-ni me·chik bi·sako sakgittam manderang drae til·ekani ja·mano dos dakgipa mande saksa digio bilone siaha ine pulisrang parakaha.

Pulisrangni paraka gitade, dos dakgipa Tafazul Islam-ko Sukrobar salo pulisrang rim·aha, indiba pulis custody-oni joke katenba digio bilone siaha.

Koborni gitade, dos dakgipa mandeko a·sel ong·gipa biapona pulisrang pringwalni 3:30 bajio rimange sing·sandianiko dakengachim.

“Jensalo ua mandeko pulisrang a·sel ong·gipa biapona rimangahaon, Tafazul Islam pulisoni joke katenba sepango donggipa digiona bilonangaha. Pulisrang bakan SDRF-ni dakachi ua mandeko sandina a·bachengaha aro uni manggisiko Sonibar pringo man·aha” ine Nagaon District-ni SP Swapnaneel Deka kobor ra·timgiparangna aganaha.

Pulisrang dos dakgipa gipin sakgni manderangkoba rim·na gita sandienga ineba parakaha.

Assam-ni Nagaon District-o donggipa Dhing minggipa songo class 10 poraienggipa me·chik bi·sa saksako August 22 tarik Bristibar attamo sakgittam manderang drae til·ekaha.

Me·chik bi·sa tuition matchote an·tangni by-cycle-o re·bapilengmitting somoio ia misilbegipa a·sel ong·aha.

Jolni manderang ua me·chik bi·sani soroksamo siboke dongako nikenba bakan hospital-ona ra·ange admit ka·aha.