Tura, Oct 9,2024:A·dokni Skotong Minister Conrad K Sangma re·anggipa antio mikka wae a·a be·gipa aro bangipa biaprangko Monggolbar salo re·ange niangaha aro a·sel ong·e sianggipa manderangni nokdangrangna lak 4 ka·e ex-gratia ba tangka paisarangko on·angjolaha.

Re·anggipa antio mikkarang dontonggija waanichi Garo Hills gimikon a·a be·anirang aro chi bananirang ong·aha aro Garo Hills-ni gimiko sak 15 manderang, siangaha.

Indakgipa neng·nikanirangko chagrongna nangenggipa manderangna dakchakaniko on·na gita Skotong Minister Monggolbar salo a·sel ong·gipa dingtang dingtang songrangona re·angaha aro sianggipa sakprakni nokdangrangna gong lak 4 ka·e ex-gratia-ko on·angaha.

Mikka wae chi dal·bamitting, somoio Dimapara sepango Bugai chibima man·pakange sianggipa Bijoy Sangma aro uni depante Wian Chigado R Marak-ni nokdangonaba Skotong Minister, Tura Rongkhon Songgital-ona re·ange grongenba, gong lak 8 ex-gratia-ko on·angaha.

Uni ja·man West Garo Hills a·jani Karonggre songo a·a be·dapako man·e sianggipa Sarika M Marak-ni nokdangkoba Skotong Minister grongeaha aro uni nokdangnaba gong lak 4 ex-gratia-ko on·angaha.

Dalu jolo donggipa Sorokpara songo a·a be·dapako man·e sianggipa me·a bi·sa Miando P Marak-ni ma·a paakoba Skotong Minister, Monggolbar salo grongenba gong lak 4 ex-gratia-ko on·angaha.

East Garo Hills a·jani Songsak Reserve-o gari bolsako bol be·dape sianggipa Tengseng R Marak-ni nokdangkoba apsan salon Skotong Minister, Dalu Tibapara songona re·ange grongeaha aro uni nokdangnaba gong lak 4 ex-gratia-ko on·angaha.

Uandake, Skotong Minister Conrad K Sangma, Dalu Koinabhui songo a·a rurongdapako man·e sianggipa Santa Marak-ni nokdangkoba grongeaha aro uni nokdangnaba gong lak 4 ex-gratia-ko on·angaha.

Dalu C&RD Block-ni ning·o a·arang be·anichi aro chi bananichi ge 2630 nokdangrang, nangchakeaniko man·aha aro nokgri jamgri ong·enggipa manderangna District Administration, dam 68 relief camp-rangko kulie on·aha. Komibeoba sak 17,000 manderangna District Administation, cha·ani ringani aro dongchakanirangko on·aha.

South Garo Hills a·jaoba dontonggija mikkarang waanichi bang·en, a·arang be·ani aro chi bananirangko man·ahani gimin Monggolbar salo a·dokni Skotong Minister, South Garo Hills District Administration baksaba tom·e, nipilanirangko dakangaha.

South Garo Hills a·jao a·a be·ani aro chi bananichi damgittam block-rango donggipa dam 40 songrang nangchakeaniko man·aha aro ge 462 nokdangrangoni sak 2510 manderang neng·nikanirangko chagrongna nangtokaha.

Apsandake Gasuapara block ning·o donggipa Atisia Songmong-o nok te·sako a·a rurongdape nokdangni sak 7 manderang sina gita nangaha aro ua sianggipa sak 7 manderangni nokdangna Monggolbar salo a·dokni Skotong Minister, ex-gratia-ko on·eaha.